03.08.2026 | 12:26
Հենրիխ Մխիթարյան. «Հիմա ես «Ինտերի» ամենատարեց խաղացողն եմ, և դա շատ բան է նշանակում»
Անկարայում Ֆիդանն ու ԵՄ պաշտոնյաները քննարկել են Հարավային Կովկասը․ կհամակարգեն խաղաղությանն ու բարգավաճմանը նպաստելու ջանքերը
Քաղաքականություն
01.07.2026 | 12:53
Թուրքիայի ԱԳ նախարար Հաքան Ֆիդանը նախօրեին Անկարայում հանդիպել է ԵՄ արտաքին գործերի և անվտանգության քաղաքականության հարցերի բարձր ներկայացուցիչ, Եվրահանձնաժողովի փոխնախագահ Կայա Կալլասի, ԵՄ ընդլայնման հարցերով հանձնակատար Մարթա Կոսի ու ԵՄ ներքին գործերի և միգրացիայի հարցերով հանձնակատար Մագնուս Բրունների հետ։ Անկարայում կայացած հանդիպման արդյունքներով համատեղ հայտարարություն է տարածվել, որը հրապարակել է Թուրքիայի ԱԳՆ-ն։
Մասնավորապես, կողմերը քննարկել են Թուրքիա-ԵՄ հարաբերությունները գլոբալ հեռանկարում՝ հիշատակելով Թուրքիայի թեկնածուի կարգավիճակը և ընդունելով Թուրքիա-ԵՄ հարաբերությունների ռազմավարական արժեքը տարածաշրջանային կայունության և տնտեսական դիմադրողականության խթանման գործում արագ փոփոխվող աշխարհաքաղաքական միջավայրում: Կողմերը վերահաստատել են համատեղ վճռականությունը՝ ձեռնարկելու քայլեր, որոնք կխթանեն համագործակցային և փոխշահավետ հարաբերությունները այս ոլորտներում։ Համաձայնել են տարածաշրջանային կայունության և բարիդրացիական հարաբերությունների կարևորության վերաբերյալ ու աջակցություն հայտնել ՄԱԿ-ի գլխավոր քարտուղարի ջանքերին Կիպրոսի հարցի վերաբերյալ։
Հանդիպման մասնակիցները համաձայնել են, որ Թուրքիան ու Եվրամիությունը կիսում են Ուկրաինայի ինքնիշխանությունն ու տարածքային ամբողջականությունը պաշտպանելու և միջազգային իրավունքի վրա հիմնված արդար և երկարատև խաղաղությունը սատարելու հանձնառությունը։ ԵՄ-ն հիշեցրել է բոլոր պետությունների կողմից ԵՄ պատժամիջոցների շրջանցումը կանխելու կարևորությունը։
Կողմերը համաձայնել են համակարգել Թուրքիայի և ԵՄ-ի փոխլրացնող ջանքերը՝ Հարավային Կովկասում տարածաշրջանային խաղաղությանն ու բարգավաճմանը ավելի լավ նպաստելու, կապակցվածությունը, առևտրային և տնտեսական կապերը ամրապնդելու համար։
Նշվում է, որ նրանք նաև ընդգծել են անվտանգության և պաշտպանության հարցերում երկխոսության և համագործակցության ամրապնդման կարևորությունը՝ ՆԱՏՕ-ի հետ լրացումով։
Կողմերը նաև վերահաստատել են իրենց պատրաստակամությունը շարունակել Մաքսային միության իրականացման բարելավմանն ուղղված ջանքերը՝ միաժամանակ հարթելով դրա արդիականացման ճանապարհը։ Երկու կողմերն էլ ընդգծել են արդյունաբերական քաղաքականության մեջ ներառական և փոխադարձ մոտեցման կարևորությունը Թուրքիայի և ԵՄ-ի մրցունակության և տնտեսական անվտանգության համար։ Նրանք նաև համաձայնել են, որ Թուրքիայի հնարավոր մասնակցությունը Միասնական եվրովճարային տարածքին (SEPA) օգտակար կլինի։
Քննարկվել է նաև վիզաների ազատականացման երկխոսության ներկայիս վիճակը և մտքեր են փոխանակել Թուրքիայի քաղաքացիների վիզաների դիմումների և դրանց մշակման ընթացակարգերի վերաբերյալ։ Նրանք ընդունել են ներկայիս աշխարհաքաղաքական իրավիճակը և դրա հնարավոր ազդեցությունը բնակչության տեղաշարժերի վրա, բարձրացրել Թուրքիայի և ԵՄ-ի համար առկա ընդհանուր մարտահրավերները և արտահայտել իրենց վճռականությունը՝ համատեղ աշխատելու դրանց լուծման ուղղությամբ, ներառյալ՝ սահմանների կառավարման և միգրանտների անօրինական տեղափոխման դեմ պայքարի ոլորտում համագործակցության ամրապնդումը։
Հավելենք, որ Ֆիդանից զատ՝ ԵՄ պաշտոնյաները հանդիպել են նաև Թուրքիայի նախագահ Ռեջեփ Թայիփ Էրդողանին։ Նա Անկարայում Կալլասին և նրա պատվիրակությանն ընդունել է փակ դռների հետևում։ Հանդիպմանը ներկա են եղել նաև արտգործնախարար Հաքան Ֆիդանը, հաղորդակցության բաժնի տնօրեն Բուրհանեթթին Դուրանը և նախագահի խորհրդական Ակիֆ Չաղաթայ Քըլըչը։
Թարգմանությունը՝ Էմմա Չոբանյանի
