Ռուսաստանի ԶՈւ-ն հարձակում է ծրագրում Չեռնիգովի մարզի վրա․ Սիրսկի

Ուկրաինայի զինված ուժերի գլխավոր հրամանատար Ալեքսանդր Սիրսկին կարծում է, որ երկրի տարածքում Ռուսաստանի հարձակման ամենահավանական սցենարը Չեռնիգովի մարզի ուղղությամբ առաջխաղացումն է հյուսիսից՝ Ռուսաստանի Բրյանսկի մարզից, այլ ոչ թե Բելառուսից։ Նա այս մասին հայտարարել է ТСН-ին տված հարցազրույցում, գրում է DW-ի ռուսական ծառայությունը։

Ըստ Սիրսկիի՝ ռուսները ծրագրում են ավելի խորը առաջխաղացում Չեռնիգովի մարզում, այդպիսով նպատակ ունենալով ուկրաինական զորքերի մի մասը շեղել այդ ուղղությամբ՝ «ձգելով ճակատը և զրկելով պահեստից»։

«Սա իրատեսական տարբերակ է, իհարկե, մենք դրան պատրաստվում ենք»,- ասել է Սիրսկին։

Նա նաև նշել է, որ Ռուսաստանի ռազմական հրամանատարությունը քննարկում է նաև Կիևի վրա Բելառուսից երկրորդ հարձակման սցենարը, ուստի Ուկրաինայի զինված ուժերը, «անկասկած, քննարկում են այս տարբերակը»։

«Մենք գիտենք, որ Պուտինն առաջադրանք է տվել Ռուսաստանի գլխավոր շտաբին՝ գնահատել հարձակողական գործողություն իրականացնելու տարբերակներ»,- հավելել է Ուկրաինայի ԶՈւ հրամանատարը։

Միաժամանակ, ըստ Ալեքսանդր Սիրսկիի՝ «բելառուսական կողմում զորքերի կենտրոնացում դեռևս չի նկատվել»:

«Հաշվի առնելով վերջին իրադարձությունները՝ չեմ կարծում, որ Բելառուսի ղեկավարությունը կհամարձակվի օգտագործել իր սեփական տարածքը և թույլ տալ ագրեսորին՝ այն օգտագործել որպես հարձակողական գործողության հենակետ։ Մենք փորձ ունենք, ունենք մարզված անձնակազմեր, ունենք պատրաստված զորքեր: Այլ կերպ ասած, մենք ունենք ամեն ինչ, ինչ անհրաժեշտ է այս ուղղությամբ ցանկացած գործողությունից խուսափելու և առնվազն ապահովելու համար, որ թշնամու անօդաչու թռչող սարքերը չկարողանան թռչել սահմանի երկայնքով»,- բացատրել է նա։

Օրերս Բելառուսի նախագահ Ալեքսանդր Լուկաշենկոն հրապարակավ դիմել էր Ռուսաստանին և Ուկրաինային՝ չներքաշել իր երկիրը պատերազմի մեջ։ Մեկ շաբաթ առաջ Ուկրաինայի նախագահ Վլադիմիր Զելենսկին վերջնագիր էր ներկայացրել Մինսկին՝ պահանջելով յոթ օրվա ընթացքում ապամոնտաժել այն սարքավորումները, որոնք օգնում են ռուսական անօդաչու թռչող սարքերին թիրախավորել ուկրաինական քաղաքները։

Մեկնաբանելով այս սարքավորումների հետ կապված իրավիճակը՝ Ալեքսանդր Սիրսկին նշել է, որ դրանք դեռևս չեն ապամոնտաժվել. «Երեկ մեկ վերահեռարձակիչ միացվել է։ Կարծում եմ՝ այլևս չեն միացնի դրանք»։

Թարգմանությունը՝ Էմմա Չոբանյանի