22.10.2026 | 23:31
Ուսանողական վիզայի պայմանների խախտումը կարող է զրկել ապագայում ԱՄՆ վիզա ստանալու իրավունքից
Մեծ Բրիտանիան պաշտպանության ծախսերը տարեկան կհասցնի մինչև 80 միլիարդ ֆունտի
Քաղաքականություն
30.06.2026 | 18:21
Մեծ Բրիտանիայի գործող վարչապետ Քիր Սթարմերը հայտարարել է, որ Լոնդոնը մինչև 2029 թվականը պաշտպանության ծախսերը կավելացնի մինչև գրեթե 80 միլիարդ ֆունտ սթերլինգի (105,85 միլիարդ դոլար), գրում է Current time-ը։
Սթարմերի խոսքով՝ սա թույլ կտա ռազմական ծախսերը ՀՆԱ-ի 2,3%-ից բարձրացնել մինչև 2,7%-ի, իսկ հաջորդ ընտրական փուլում այդ ցուցանիշը կարող է հասնել 3%-ի: Նոր ծրագրի շրջանակում կառավարությունն առաջիկա տարիների ընթացքում լրացուցիչ 15 միլիարդ ֆունտ է հատկացնում: Սա մոտավորապես կեսն է այն 28 միլիարդ ֆունտ սթերլինգի, որն անհրաժեշտ է Մեծ Բրիտանիայի զինված ուժերին՝ ըստ ռազմական ղեկավարության։
Լրացուցիչ միջոցներից ավելի քան հինգ միլիարդ ֆունտ կհատկացվի անօդաչու թռչող սարքերի մշակմանը: Երկիրը նաև կկառուցի «հիբրիդային նավատորմ»՝ ռազմանավեր, որոնց կուղեկցեն անօդաչու մակերևութային և ստորջրյա նավակներ։
2025 թվականի ռազմավարական պաշտպանության վերանայման համահեղինակներից Ռիչարդ Բարոնսը BBC-ին ասել է, որ ծրագիրը «չի լուծում» թերֆինանսավորման խնդիրը, և որ Մեծ Բրիտանիան հետ է մնում իր դաշնակիցներից և հակառակորդներից։ Չնայած հայտարարված աճին՝ Սթարմերը չի կարողացել հասնել ՆԱՏՕ-ի կողմից պաշտպանության և ազգային անվտանգության ծախսերը ՀՆԱ-ի 5%-ին հասցնելու նպատակին։
«Ես պարտավորվել եմ ՀՆԱ-ի 5 տոկոսը ծախսել մեր համատեղ անվտանգության վրա, ներառյալ այնպիսի ոլորտներ, ինչպիսիք են էներգետիկ անվտանգությունը, կարևորագույն ենթակառուցվածքները և պաշտպանությունը: Այսօր հրապարակված պաշտպանության ոլորտում ներդրումային ծրագիրն ապահովում է այդ պարտավորության 4,2 տոկոսը: Ամեն դեպքում, սա հսկայական, պատմական տեղաշարժ է մեր երկրի համար, և ես հպարտ եմ այդ ժառանգությամբ»,- ասել է Սթարմերը։
Հունիսի 22-ին Քիր Սթարմերը հայտարարել էր Լեյբորիստական կուսակցության առաջնորդի և վարչապետի պաշտոնից հրաժարականի մասին, սակայն շարունակում է պաշտոնավարել որպես կառավարության ղեկավարի պաշտոնակատար՝ մինչև իրավահաջորդության գործընթացի ավարտը։
Տասը օր առաջ Մեծ Բրիտանիայի պաշտպանության նախարար Ջոն Հիլին հայտարարել էր հրաժարականի մասին՝ վկայակոչելով Սթարմերի ձախողումը և Ֆինանսների նախարարության կողմից երկրի պաշտպանության համար անհրաժեշտ միջոցները չհատկացնելը։ Դեն Ջարվիսը, որն աջակցում է Սթարմերի նոր ծրագրին, ստանձնել է պաշտպանության նախարարի պաշտոնը։
Թարգմանությունը՝ Էմմա Չոբանյանի
