05.09.2026 | 22:55
«Ինտերը» 0:2-ից հետո կամային հաղթանակ է տարել «Նապոլիի» նկատմամբ. ՏԵՍԱՆՅՈՒԹ
Վրաստանն ու Ղազախստանը ռազմավարական գործընկերության մասին հռչակագիր են ստորագրել
Քաղաքականություն
29.06.2026 | 22:03
Վրաստանն ու Ղազախստանը պաշտոնապես ռազմավարական գործընկերություն են հաստատել, գրում է Sova news-ը։
«Վրաստանի վարչապետ Իրակլի Կոբախիձեն և Ղազախստանի նախագահ Կասիմ-Ժոմարտ Տոկաևը ստորագրել են համատեղ հռչակագիր, որի համաձայն՝ Վրաստանի և Ղազախստանի միջև հարաբերությունները տեղափոխվում են ռազմավարական գործընկերության մակարդակի»,- ասվում է Վրաստանի կառավարության աշխատակազմի հայտարարության մեջ։
Վրաստանն ու Ղազախստանը պաշտոնապես ստորագրել են համատեղ հռչակագիր Կոբախիձեի Աստանա կատարած այցի շրջանակում։ Երկարատև բանակցություններից հետո կողմերը ստորագրել են նաև մի շարք միջգերատեսչական համագործակցության հուշագրեր, որոնք վերաբերում են մշակույթի, տեղեկատվական տեխնոլոգիաների և զբոսաշրջության ոլորտներում համագործակցությանը։
Ղազախստանի նախագահը Վրաստանի վարչապետ Իրակլի Կոբախիձեին հանձնել է Առաջին աստիճանի Պատվո շքանշան։
Նախագահական պալատում Ղազախստանի նախագահ Կասիմ-Ժոմարտ Տոկաևի հետ ընդլայնված բանակցությունների ժամանակ Վրաստանի կառավարության ղեկավարը նշել է, որ հարաբերությունները ռազմավարական գործընկերության մակարդակի բարձրացնելը կարևոր նվաճում է, որը նոր հնարավորություններ է բացում երկու երկրների միջև համագործակցության ընդլայնման համար մի շարք ոլորտներում։
«Ռազմավարական գործընկերությունը մեր երկկողմ հարաբերություններում կարևոր նվաճում է։ Վստահ եմ, որ այս քայլը նոր հնարավորություններ կստեղծի մեր երկրների միջև համագործակցության ընդլայնման համար։ Մենք նաև անհամբեր սպասում ենք Վրաստանում միջկառավարական հանձնաժողովի հաջորդ նիստին, որը լրացուցիչ խթան կհաղորդի առևտրային և ներդրումային կապերին», – նշել է Վրաստանի վարչապետը։
Իր հերթին, Ղազախստանի նախագահը ռազմավարական գործընկերության փաստաթղթի ստորագրումն անվանել է պատմական որոշում, որը ծառայում է երկու երկրների ժողովուրդների շահերին։
«Այսօր մենք կստորագրենք համատեղ հայտարարություն, որը մեր հարաբերությունները կբարձրացնի ռազմավարական գործընկերության մակարդակի։ Սա իսկապես պատմական որոշում է, որը ստեղծում է ամուր հիմք համագործակցության հետագա ընդլայնման համար»,- ասել է Կասիմ-Ժոմարտ Տոկաևը։
Նա նաև բարձր է գնահատել Վրաստանի վերջին տարիների նվաճումները՝ նշելով, որ երկիրը հաջողությամբ հաղթահարում է բարդ մարտահրավերները, ամրապնդում ժողովրդավարական ինստիտուտները, ցուցաբերում տնտեսական աճ և ամրապնդում իր դիրքերը միջազգային ասպարեզում։
«Մենք Վրաստանը դիտարկում ենք որպես դինամիկ, ապագային միտված երկիր և անկեղծորեն մաղթում ենք նրան հաջողություններ իր ազգային նպատակներին հասնելու գործում»,- եզրափակել է Ղազախստանի ղեկավարը։
Թարգմանությունը՝ Էմմա Չոբանյանի
