26.07.2026 | 11:14
Վրաստանի շտապօգնության մեքենայով Երևան է տեղափոխվել վթարից տուժած աղջիկ երեխա
ՌԴ-ն և Ադրբեջանը կարգավորել են AZAL-ի ինքնաթիռի կործանման հետ կապված բոլոր հարցերը
Քաղաքականություն
29.06.2026 | 18:27
Մոսկվան և Բաքուն կարգավորել են 2024 թվականի դեկտեմբերին Ակտաուի մոտակայքում տեղի ունեցած «Ադրբեջանական ավիաուղիներ» (AZAL) ավիաընկերության ինքնաթիռի կործանման հետ կապված բոլոր հարցերը։ Ադրբեջանական լրատվամիջոցների հաղորդմամբ՝ այս մասին RTVI-ին տված հարցազրույցում հայտարարել է Ռուսաստանի փոխարտգործնախարար Միխայիլ Գալուզինը։
«Մենք կարգավորել ենք ադրբեջանական ինքնաթիռի կործանման հետևանքների հետ կապված բոլոր հարցերը։ Սակայն այդ հարցերը, ինչպես հասկանում եք, վերաբերում են կոնկրետ անձանց, ովքեր ապրել են սարսափելի ողբերգություն, ովքեր կրել են անդառնալի կորուստ։ Հետևաբար, ես չէի ցանկանա այստեղ մանրամասնել»,- նշել է նա։
Բացի այդ, Գալուզինը հայտարարել է, որ Ադրբեջանի արտաքին գործերի նախարար Ջեյհուն Բայրամովի հայտարարված այցի ընթացքում Ռուսաստանը կբարձրացնի Բաքվում անցյալ տարվա հունիսի 30-ից հուլիսի 1-ը ձերբակալված ՌԴ 11 քաղաքացիների արագ ազատ արձակման հարցը։
«Այս հարցը քննարկվում է Ռուսաստանի և Ադրբեջանի համապատասխան գերատեսչությունների կողմից, և մենք ակնկալում ենք, որ մեր քաղաքացիները շուտով ազատ կարձակվեն»,- նշել է դիվանագետը։
Գալուզինը նշել է, որ Բայրամովի՝ Մոսկվա այցի ժամկետները դեռևս մշակվում են և դեռևս վերջնականապես որոշված չեն։ Նա հավելել է, որ Ռուսաստանն ակնկալում է իր ադրբեջանցի գործընկերների հետ քննարկել երկկողմ հարցերի ամբողջ շրջանակը, ներառյալ՝ քաղաքական, առևտրային, տնտեսական, մշակութային և մարդասիրական հարցերը։
«Իհարկե, մենք այս ամենը կանենք Ռուսաստանի և Ադրբեջանի նախագահների կողմից 2022 թվականի փետրվարին ստորագրված դաշնակցային համագործակցության մասին հռչակագրի հետևողական իրականացման տեսանկյունից»,- ընդգծել է Գալուզինը։
Հիշեցնենք, որ 2024 թվականի դեկտեմբերի 25-ին Բաքվից Գրոզնի թռչող AZAL-ի ինքնաթիռը վթարի էր ենթարկվել Ղազախստանի Ակտաու քաղաքի մոտակայքում։ Ինքնաթիռում եղել է 62 ուղևոր, այդ թվում՝ 37 Ադրբեջանի, 16 Ռուսաստանի, 6 Ղազախստանի և 3 Ղրղզստանի քաղաքացի, ինչպես նաև անձնակազմի 5 անդամ։ Վթարի հետևանքով զոհվել էր 38 մարդ, այդ թվում՝ երեք երեխա։
Բաքուն հայտարարել էր, որ ինքնաթիռը վթարի է ենթարկվել Գրոզնիի վրայով Ռուսաստանի օդային տարածքում տեղի ունեցած ֆիզիկական և տեխնիկական արտաքին միջամտության հետևանքով ու մեղադրել Մոսկվային հարվածի համար։ 2026 թվականի ապրիլին Ադրբեջանն ու Ռուսաստանը համաձայնության էին հասել AZAL ինքնաթիռի վթարի հետևանքները լուծելու, այդ թվում՝ զոհերի և վիրավորների ընտանիքներին փոխհատուցում տրամադրելու վերաբերյալ։
