Պեսկովը հայտարարել է, որ ԱՄՆ-ը բացարձակ չեզոք չէ Ուկրաինայի հակամարտության հարցում

Ֆրանսիայի նախագահ Էմանուել Մակրոնը դժվար թե կարողանա խոսել Վաշինգտոնի անունից այն մասին՝ արդյո՞ք Միացյալ Նահանգները չեզոք միջնորդ է Ուկրաինայի հակամարտության կարգավորման գործում։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Նախագահ Մակրոնի հայտարարությունների վերաբերյալ դժվար է դատել։ Ես չեմ կարծում, որ նախագահ Մակրոնը կարող է որևէ կերպ հավակնել Վաշինգտոնի փաստաբանի  կամ մամուլի քարտուղարի դերին։ Բայց մենք դեռևս Միացյալ Նահանգներից որևէ հայտարարություն չենք լսել, որը կհաստատեր դա»,- լրագրողներին ասել է Պեսկովը՝ մեկնաբանելով Ֆրանսիայի նախագահի հայտարարությունը, որի համաձայն՝ Միացյալ Նահանգներն այլևս չեզոք միջնորդ չէ Ուկրաինայում հակամարտության կարգավորման գործում։

«Եթե մենք խոսում ենք բացարձակ չեզոքության մասին, ապա, հնարավոր է, «բացարձակ չեզոքություն» տերմինը կիրառելի չէ, քանի որ ԱՄՆ-ն Ուկրաինային մատակարարում է զենքի մեծ մասը․ նախկինում դա անում էին պսևդոանվճար, հիմա՝ փողի դիմաց, Ուկրաինային օգնություն է ցուցաբերում տեխնոլոգիաների ոլորտում և այլն։ Այս գործընթացը շարունակվում է։ Միևնույն ժամանակ, հաշվի առնելով ԱՄՆ-ի ազդեցությունը թե՛ եվրոպական երկրներում, թե՛ Ուկրաինայում, և հաշվի առնելով այն, ինչը մենք համարում ենք նախագահ Թրամփի և նրա բանակցային թիմի անկեղծ ցանկությունը՝ օգնելու խաղաղ կարգավորման հասնելուն, մենք բարձր ենք գնահատում ԱՄՆ-ի այս պատրաստակամությունը։ Առնվազն ոչ ոք չի հրաժարվել այս պատրաստակամությունից, ոչ ոք չի ժխտել, որ ԱՄՆ-ն մտադիր է շարունակել իր ջանքերը»,- նշել է ՌԴ նախագահի մամուլի քարտուղարը։

Պեսկովը հիշեցրել է, որ ԱՄՆ նախագահը հայտարարել էր, թե իրանական կարգավորման հետ կապված բոլոր հարցերի լուծումից հետո ուկրաինական հարցի շուրջ միջնորդությունը կակտիվանա։

«Մենք կողջունենք դա, մենք բաց ենք մնում այդ ծառայությունների և հենց խաղաղության գործընթացի համար»,- ընդգծել է Կրեմլի խոսնակը։

Թարգմանությունը՝ Էմմա Չոբանյանի