28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Արմեն Մելիքբեկյանը մտադիր չէ առաջադրվել ՀՖՖ նախագահի ընտրություններում
25.06.2026 | 23:51
Հայաստանի ֆուտբոլի ֆեդերացիայի նախագահ Արմեն Մելիքբեկյանը մտադրություն չունի առաջադրվելու ՀՖՖ նախագահի առաջիկա ընտրություններում: Այս մասին նա հայտարարել է ֆուտբոլային մեկնաբան Արմեն Գարամյանի հետ զրույցում:
«Այս պահին ես ընդհանրապես չեմ մտածում ընտրությունների մասին, որովհետև մինչև ընտրությունները շատ մեծ ծավալի աշխատանք կա անելու։ Ես մտադրություն չունեմ առաջադրվելու»,- ասել է Մելիքբեկյանը։
Անկախ նրանից, թե ապագայում ով կլինի ֆեդերացիայի նախագահը, Մելիքբեկյանի խոսքով, կարևորն այն է, որ շարունակվեն արդեն մեկնարկած ծրագրերը:
Անդրադառնալով իր հետագա գործունեությանը՝ ՀՖՖ գործող նախագահը նշել է, որ ֆուտբոլից հեռանալու մտադրություն չունի։ Նա հիշեցրել է, որ ներկայումս ՈՒԵՖԱ-ի Գործադիր կոմիտեի անդամ է, ՈՒԵՖԱ-ի երկու կոմիտեների և ՖԻՖԱ-ի կոմիտեի փոխնախագահ։
«Զբաղվածության առումով անհանգստանալու բան չունեմ։ Պատրաստվում եմ շարունակել զբաղվել ֆուտբոլով, բայց ավելի շատ՝ իմ միջազգային գործունեությամբ»,- ասել է Արմեն Մելիքբեկյանը:
Հիշեցնենք, որ օրերս հրաժարական էր տվել ՀՖՖ փոխնախագահ և գործկոմի անդամ Արմեն Նիկողոսյանը: Նա նշել էր, որ իր որոշումը պայմանավորված է վերջին տարիներին հայկական ֆուտբոլում գրանցված կարևոր ձեռքբերումներով։
Հավելենք, որ ավելի վաղ` մայիսի 11-ին, Factor TV-ն գրել էր՝ իշխանությունը ՀՖՖ նախագահի պաշտոնի համար քննարկում է ՔՊ-ական Հակոբ Սիմիդյանի և պատգամավոր Սիսակ Գաբրիելյանի թեկնածությունները։
Factor TV-ի հետ զրույցում Հակոբ Սիմիդյանը ասել էր, որ իր նշանակման շուրջ որևէ քննարկում չկա` միևնույն ժամանակ չբացառելով, որ առաջիկայում կարող է քննարկվել ՀՖՖ նախագահի փոփոխության հարցը։
Սիսակ Գաբրիելյանն էլ Factor TV-ի հետ զրույցում նշել էր, որ ինքը ՀՖՖ նախագահի պաշտոնի հավակնություն չունի։
Մամուլում շրջանառվում է նաև ԲՏԱ նախարար Մխիթար Հայրապետյանի անունը: Նրա խոսնակը, սակայն, հայտնել է, որ նախարարը հավակնություն չունի։
Հիշեցնենք, որ Հայաստանի ֆուտբոլի ֆեդերացիայի գործող նախագահ Արմեն Մելիքբեկյանի պաշտոնավարման ժամկետը լրանում է դեկտեմբերի վերջին։ Նա ՀՖՖ նախագահի պաշտոնում վերընտրվել է 2023-ի դեկտեմբերի 23-ին։ Մելիքբեկյանի մրցակիցը Հայաստանի հավաքականի նախկին ֆուտբոլիստ Արաս Օզբիլիզն էր։ Ընտրությանը մասնակցել էր ՀՖՖ 25 անդամներից 23-ը։ Ֆուտբոլասեր համայնքը՝ ՖԱՖ ակումբը և Կարմիր Արծիվները, տևական ժամանակ է՝ պահանջում են Արմեն Մելիքբեկյանի հրաժարականը։ Ինքը՝ Մելիքբեկյանը, մեկ տարի առաջ հրավիրված մամուլի ասուլիսի ժամանակ նշել էր, որ չի պատրաստվում հրաժարական տալ։
Արփի Հակոբյան
