Անկարայում ՆԱՏՕ-ի գագաթնաժողովից առաջ ԻԼԻՊ-ի հետ կապված կասկածյալ է սպանվել

Թուրքական ոստիկանությունը սպանել է ԻԼԻՊ ահաբեկչական խմբավորման հետ կապերի մեջ կասկածվող տղամարդու Անկարայի մոտակայքում գտնվող թաղամասերից մեկում իրականացված խուզարկության ժամանակ, թուրքական լրատվամիջոցներին հայտնել են անվտանգության աղբյուրները, գրում է Turkish Minute-ը։

Դեպքը տեղի է ունեցել երեքշաբթի վաղ առավոտյան ոստիկանական խուզարկությունների ժամանակ՝ հուլիսի 7-8-ը Անկարայում կայանալիք ՆԱՏՕ-ի գագաթնաժողովից երկու շաբաթ առաջ, որին մասնակցելու են աշխարհի 32 երկրներից առաջնորդներ, այդ թվում՝ ԱՄՆ նախագահ Դոնալդ Թրամփը։ DHA և IHA լրատվական գործակալությունների հաղորդմամբ՝ կրակոցները տեղի են ունեցել Սազաղասիում՝ մայրաքաղաքից մոտ 100 կիլոմետր հարավ, միաժամանակյա գործողության ընթացքում, որի ժամանակ ոստիկանությունը ձերբակալել է ավելի քան 200 մարդու։

Կասկածյալ Մ.Կ.-ն սպանվել է, երբ ոստիկանության հատուկ նշանակության ջոկատը ռեյդ է իրականացրել այն վայրում, որտեղ նա բնակվում էր կնոջ՝ Ն.Կ.-ի հետ։ IHA գործակալությունը հայտնել է, որ զույգը նախ կրակ է բացել ոստիկանների վրա, ինչը հանգեցրել է փոխհրաձգության։

Ո՛չ Անկարայի նահանգապետի գրասենյակը, ո՛չ էլ Անկարայի դատախազությունը AFP-ին չեն մեկնաբանել միջադեպը։

Երեքշաբթի դատախազությունը հաստատել էր 241 մարդու ձերբակալության օրդերի տրամադրումը, իսկ հակաահաբեկչական ոստիկանությունը քաղաքում և շրջակայքում վաղ առավոտյան իրականացված խուզարկությունների ժամանակ ձերբակալել է 209 մարդու։

Թարգմանությունը՝ Էմմա Չոբանյանի