Ալիևը Հայաստանին մեղադրել է իսլամական կրոնական և մշակութային հուշարձանները «ոչնչացնելու» մեջ

Ադրբեջանի նախագահ Իլհամ Ալիևն ուղերձ է հղել Բաքվում անցկացվող Իսլամական համագործակցության կազմակերպության անդամ պետությունների խորհրդարանական միության 20-րդ նստաշրջանի մասնակիցներին։ Նրա ելույթի տեքստն ընթերցել է Ադրբեջանի Միլլի Մեջլիսի խոսնակ Սահիբա Գաֆարովան։

«ԻՀԿ-ն վճռական դիրքորոշում է ցուցաբերել Հայաստանի կողմից Ադրբեջանի դեմ գրեթե 30-ամյա ագրեսիայի ընթացքում և պատերազմից հետո՝ ընդունելով բանաձևեր և հայտարարություններ, որոնք խստորեն դատապարտում էին օկուպացիան, աջակցում էին Ադրբեջանի արդար գործին, ինքնիշխանությանը և տարածքային ամբողջականությանը, և ողջունում էին մեր ազատագրված տարածքներում վերականգնողական և շինարարական աշխատանքները»,- նշել է Ալիևը։

Նա Հայաստանին մեղադրել է իսլամական կրոնական և մշակութային հուշարձանները, իբր, «ոչնչացնելու» մեջ։

«Ցավոք, օկուպացիայի ընթացքում մեր քաղաքներում և գյուղերում մզկիթներն ու դարավոր իսլամական ճարտարապետական ​​հուշարձանները միտումնավոր ոչնչացվել և թալանվել են: 67 մզկիթներից 65-ը ոչնչացվել են, իսկ մյուս երկուսը լուրջ վնասներ են կրել: Այս սուրբ վայրերի օգտագործումը որպես ախոռներ և մեր կրոնում արգելված համարվող կենդանիների այնտեղ պահելը վիրավորանք է ոչ միայն ադրբեջանցիների, այլև աշխարհի բոլոր մահմեդականների զգացմունքների համար»,- հայտարարել է նա։

Իսկ Արևմուտքին Ալիևը մեղադրել է իսլամատյացության մեջ։

«Մեր հողերում իսլամական մշակութային ժառանգության դեմ կատարված այս հանցագործությունները, անկասկած, իսլամատյացության հստակ դրսևորում են։ Հիասթափեցնող է, որ Արևմուտքի որոշ քաղաքական շրջանակներ, ինչպես նաև միջազգային կառույցներ, ինչպիսիք են Եվրախորհրդարանը և Եվրոպայի խորհրդի Խորհրդարանական վեհաժողովը, փորձում են բորբոքել հակաիսլամական տրամադրություններ, իսլամը նույնացնել ծայրահեղականության և ահաբեկչության հետ, ստեղծել մեր կրոնի նկատմամբ նախապաշարմունքային պատկերացում և այն ներկայացնել որպես վտանգի աղբյուր»,- ասել է Ալիևը ուղերձում։

Թարգմանությունը՝ Էմմա Չոբանյանի