Իսրայելը պետք է ազատվի ամերիկյան զենքից կախվածությունից. Իրանի դեմ պայքարը «կախված է մեր ուժից»․Նեթանյահու

Իսրայելի վարչապետ Բենիամին Նեթանյահուն հայտարարել է, որ Իսրայելը պետք է «ազատ» լինի Միացյալ Նահանգներից ռազմական կախվածությունից և զարգացնի իր սեփական զենքի արտադրության հնարավորությունները՝ հավելելով, որ դա անհրաժեշտ է Իրանի և նրա պրոքսիների  դեմ շարունակվող պայքարին աջակցելու համար, գրում է The Times of Israel-ը։

«Ես մեծապես գնահատում եմ մեր ամերիկացի ընկերների կողմից ստացված և տարիների ընթացքում ապահովված աջակցությունը։ Բայց այսօր ես ասում եմ՝ մեզ անհրաժեշտ է մեր սեփական զենքի անկախ արտադրության համակարգը։ Մենք պետք է արտադրենք մեր սեփական զենքը։ Մենք այժմ բախվում ենք Իրանին և նրա պրոքսիներին։ Մենք նրանց ուժեղ հարված ենք հասցրել։ Ամեն ինչ դեռ չի ավարտվել, բայց կախված է մեր ուժից։ Այն, թե որտեղ կլինենք 30 տարի հետո, կախված է մեր ուժից։ Ահա թե ինչու մենք հիմա ավելի մեծ ուժ պետք է կառուցենք»,- ասել է նա՝ հավելելով, որ ցանկանում է, որ Իսրայելն «ունենա անկախ սպառազինության կարողություն»։

Լրատվամիջոցը գրում է, որ Նեթանյահուն ամիսներ շարունակ խոստացել էր դադարեցնել ԱՄՆ-ի ռազմական օգնությունն Իսրայելին հաջորդ տասնամյակի ընթացքում, սակայն այսօրվա հայտարարությունները հնչում են հատկապես լարված պահի՝ Երուսաղեմում աճող մտահոգությունների ֆոնին, որ ԱՄՆ-ը սահմանափակում է իր գործողությունների ազատությունը, քանի որ Վաշինգտոնը շարունակում է առաջ մղել Թեհրանի հետ համաձայնագիրը, որին Իսրայելը մեծապես դեմ է։

«Մենք պետք է ազատվենք կախվածությունից, շարունակենք ավելի ու ավելի շատ ուժեր կուտակել, ավելի ու ավելի շատ տեխնոլոգիաներ ներդնել և ձեզ նման հրամանատարների ավելի ու ավելի շատ սերունդներ պատրաստել, քանի որ, վերջին հաշվով, դա է, որ կորոշի մեր դիրքորոշումը»,- նշել է Նեթանյահուն։

ԱՄՆ փոխնախագահ Ջեյ Դի Վենսը անցյալ շաբաթ մամուլի ասուլիսում նշել էր, որ վերջին ամիսներին «[Իսրայելը] պաշտպանող պաշտպանական զենքի երկու երրորդն» արտադրվել է ԱՄՆ-ում և ֆինանսավորվել է ամերիկյան հարկատուների կողմից։

ԱՄՆ-ի և Իսրայելի պաշտոնյաները նշում են, որ վերջերս սկսված ԱՄՆ-Իսրայել անվտանգության ոլորտում համագործակցության նոր 10-ամյա շրջանակի շուրջ բանակցությունները նպատակ ունեն «աստիճանաբար անցում կատարել» շրջանակին՝ «օգնությունից դեպի լիովին փոխադարձ գործընկերություն»։

Թարգմանությունը՝ Էմմա Չոբանյանի