Դպրոցները փակվել են, Ֆրանսիայի կեսից ավելին ռեկորդային շոգի պատճառով կարմիր գոտում է

Ֆրանսիայի շրջանների կեսից ավելին գտնվում է շոգի կարմիր վտանգի գոտում, քանի որ երկիրը պատրաստվում է ուժեղացող շոգի ալիքի։ Երկուշաբթի արևմտյան Ֆրանսիայի որոշ հատվածներում ավելի քան 40°C ջերմաստիճան էր կանխատսվում, իսկ Բորդոյում՝ նույնիսկ 42°C, հայտնել է Météo-France օդերևութաբանական ծառայությունը, գրում է BBC-ն։

Կրթության նախարարությունը հայտնել է, որ շուրջ 845 դպրոց փակվել է, ևս 1800-ը թույլ են տալիս աշակերտներին վաղաժամ ավարտել դասերը: Սակայն մեկ միլիոնից ավելի ավագ դպրոցի աշակերտներ պետք է հանձնեն բակալավրիատի բանավոր ավարտական ​​քննությունները։ Ֆրանսիայի կառավարությունը զգուշացրել է մարդկանց՝ չփորձել զովանալ անվերահսկելի վայրերում, ինչպիսիք են լճերը և գետերը, շաբաթավերջին ջրահեղձության հետևանքով 13 մահվան դեպքից հետո:

Կարմիր ահազանգը Météo-France-ի կողմից տրված չորս նախազգուշացումներից ամենաբարձրն է և խորհուրդ է տալիս մարդկանց ծայրահեղ զգույշ լինել կյանքի համար վտանգավոր պայմաններում։ Ֆրանսիայի տասնյակ այլ շրջաններ գտնվում են նարնջագույն տագնապի գոտում՝ երկրորդ ամենաբարձր նախազգուշացման, որի հետևանքով, ըստ գնահատականների, երկրում, ընդհանուր առմամբ, տուժել է 63 միլիոն մարդ։ SNCF ազգային երկաթուղային օպերատորը կոչ է արել «խոցելի» մարդկանց խուսափել կամ հետաձգել գնացքով ուղևորություններն այս շաբաթ, մինչդեռ Փարիզում մի քանի երկաթուղային գծեր երկուշաբթի կրճատել են իրենց ծառայությունները շոգի պատճառով։

Բելգիայի երկաթուղային օպերատորը նաև հայտարարել է, որ շոգի գագաթնակետի ժամերին որոշ գնացքների երթևեկությունը չեղարկվելու է երկուշաբթի և երեքշաբթի օրերին: IRM օդերևութաբանական ինստիտուտը հայտնել է, որ Բելգիայում ջերմաստիճանն առաջիկա շաբաթ կհասնի ռեկորդային մակարդակի:

Միաժամանակ, կանխատեսվում է, որ երկուշաբթի Իսպանիայի մայրաքաղաք Մադրիդում ջերմաստիճանը կհասնի 39°C-ի, իսկ Իտալիայի մայրաքաղաք Հռոմում՝ մինչև 37°C-ի: Կարմիր նախազգուշացում է ուժի մեջ նաև Արևմտյան և Կենտրոնական Եվրոպայի այլ մասերում՝ երկուշաբթի օրվանից ուժի մեջ մտնելով Գերմանիայում և Շվեյցարիայում, իսկ երեքշաբթի օրվանից՝ Լյուքսեմբուրգում:

Ջերմաստիճանի բարձրացումը պայմանավորված է Սահարա անապատից դեպի հյուսիս շարժվող տաք օդով, որն էլ, իր հերթին, տաք օդ է պահպանում Արևմտյան և Կենտրոնական Եվրոպայի վրայով։ Օդերևութաբանները ենթադրում են, որ այս պայմանները կարող են հանգեցնել վերջին տարիների ամենաերկար ջերմային ալիքներից մեկի։

Չորեքշաբթի շատ շրջաններում ջերմաստիճանը կհասնի գագաթնակետին։ Météo-France-ը հայտնել է, որ Ֆրանսիայում 1947 թվականից ի վեր գրանցված 51 ջերմային ալիքներից 34-ը տեղի են ունեցել 2000 թվականից, իսկ 26-ը՝ 2011 թվականից։

Մեծ Բրիտանիայի օդերևութաբանական գրասենյակը չորեքշաբթի և հինգշաբթի օրերին Անգլիայի և Ուելսի որոշ հատվածների համար հազվագյուտ կարմիր տապի նախազգուշացում է տարածել, կանխատեսումների համաձայն՝ այս շաբաթ որոշ շրջաններում ջերմաստիճանը կարող է հասնել 38°C-ի (100°F):

Ֆրանսիայում ստեղծված իրավիճակը հաջորդել է շաբաթավերջին ալկոհոլի արգելքի ամենամյա «Fête de la Musique»-ի ժամանակ, որն ազգային փառատոն է, որը մեծ բազմություն է տոնում քաղաքների մեծ մասի փողոցներում։ Արգելքը տարածվում էր Ֆրանսիայի պետության և նրա գործակալությունների կողմից կազմակերպված բոլոր միջոցառումների վրա և նպատակ ունի  «պահպանել շտապօգնության և առողջապահական ծառայությունները և թույլ տալ բժշկական անձնակազմին կենտրոնանալ ամենախոցելի խմբերի խնամքի վրա», հայտարարել է կառավարությունը։

Հարավարևմտյան Ժիրոնդ շրջանում տեղական իշխանությունները կիրակի  հայտնել են, որ երեք մարդ՝ 80-ից 95 տարեկան, մահացել է, մասամբ՝ ուժեղ շոգի պատճառով։ Առողջապահության նախարար Ստեֆանի ֆրանսիական հանրային հեռարձակող TV1 Info-ին ասել է, որ շատ «քաղաքացիներ կտուժեն» շոգ եղանակի ժամանակ, և կոչ է արել մարդկանց «ուշադիր հետևել» հարազատներին և հարևաններին։ Météo-France-ը հայտնել է, որ չնայած ամենաշոգ ջերմաստիճանը սպասվում է արևմտյան ափին, երկրի մնացած մասում առավելագույն ջերմաստիճանը սպասվում է 36°C-ից 40°C-ի սահմաններում։

Օդերևութաբանները զգուշացրել են, որ շոգի ալիքը կլինի «լայնածավալ, երկարատև և ինտենսիվ», և ջերմաստիճանի անկում չի սպասվում մինչև շաբաթվա վերջ։

Թարգմանությունը՝ Էմմա Չոբանյանի