Թուրքիայում ընդդիմության կողմից ղեկավարվող համայնքներում ձերբակալությունների նոր ալիք է

Թուրքիայի կառավարությունն ուժեղացնում է ընդդիմության նկատմամբ վերահսկողությունը՝ ուրբաթ օրն իրականացրած նոր ձերբակալություններով, որոնք ուղղված են գլխավոր ընդդիմադիր  Ժողովրդահանրապետական ​​կուսակցության (CHP) ընտրված պաշտոնյաների դեմ, մինչ այն բախվում է խորացող ղեկավարության ճգնաժամի, գրում է Turkish Minute-ը։

Ձերբակալությունները, ինչպես նաև Թուրքիայի ամենահին քաղաքական կուսակցությանը դատարանի կողմից արտոնված միջամտությունը լուրջ մտահոգություններ են առաջացրել ժողովրդավարության և օրենքի գերակայության վիճակի վերաբերյալ, ինչը քննադատության է արժանացել Եվրախորհրդարանի այս շաբաթվա զեկույցում։

Իրավապահները գործողություններ են իրականացրել Ստամբուլի Ադալար շրջանում և Թուրքիայի հարավում գտնվող CHP-ի կողմից ղեկավարվող համայնքներում, այդ թվում՝ կոռուպցիայի և խարդախության մեղադրանքներով։

Ոստիկանությունն առավոտյան ժամերին միաժամանակյա խուզարկություններ է անցկացրել չորս քաղաքներում՝ ձերբակալելով 47 կասկածյալներից 37-ին։ Ձերբակալվածների թվում է նաև Ադալարի քաղաքապետ Ալի Էրջան Ակփոլաթը։ Կասկածյալները մեղադրվում են կաշառակերության, յուրացման, պաշտոնական փաստաթղթերի կեղծման, հանցավոր կազմակերպություն կազմավորելու և ղեկավարելու, ինչպես նաև պաշտոնեական լիազորությունների չարաշահման մեջ, ասվում է հայտարարության մեջ։ Առանձին գործողություն է իրականացվել Մերսին նահանգի Սիլիֆկե համայնքում։

Ձերբակալությունները հաջորդում են անցյալ շաբաթվա ընթացքում CHP-ի կողմից ղեկավարվող մունիցիպալիտետների դեմ մի շարք գործողություններին, այդ թվում՝ Ստամբուլի Բեյլիքդյուզյու և Սիլիվրի շրջաններում, ինչպես նաև Իզմիրի Սեֆերիհիսար շրջանում։

CHP-ն կառավարությանը մեղադրում է քաղաքական դրդապատճառներով գործողություններ կազմակերպելու մեջ, որոնք ուղղված են ընդդիմությանը թուլացնելուն, այն բանից հետո, երբ այն 2024 թվականի տեղական ինքնակառավարման մարմինների ընտրություններում հաղթեց նախագահ Ռեջեփ Թայիփ Էրդողանի իշխող «Արդարություն և զարգացում» կուսակցությանը։

Հավելենք, որ չորեքշաբթի Եվրախորհրդարանի կողմից հաստատված զեկույցը կոչ է արել Թուրքիային անդրադառնալ օրենքի գերակայության ոլորտում առկա թերություններին։ Զեկույցում նաև կոչ է արվել հնարավոր պատժամիջոցներ կիրառել արդարադատության նախարար Աքըն Գյուրլեքի նկատմամբ, որը Ստամբուլի գլխավոր դատախազի պաշտոնավարման ընթացքում ղեկավարել է ընդդիմադիր գործիչների դեմ բարձրաստիճան գործեր։

Թուրքիայի արտաքին գործերի նախարարությունը հակադարձել է՝ զեկույցում ներկայացված մեղադրանքներն «անհիմն» որակելով։

CHP-ի հարյուրավոր պաշտոնյաներ ամբողջ երկրում ձերբակալվել են կոռուպցիայի ենթադրյալ դեպքերի վերաբերյալ շարունակվող հետաքննությունների շրջանակներում, այդ թվում՝ Ստամբուլի քաղաքապետ Էքրեմ Իմամօղլուն։ Վերջինը երկար ժամանակ համարվում էր միակ թուրք քաղաքական գործիչը, որը կարող էր մրցակցել Էրդողանի հետ։

CHP-ն նրան 2028 թվականի նախագահական ընտրությունների համար իր թեկնածու էր ընտրել՝  նույն օրը, երբ նա բանտարկվել էր։ Նրա բացակայության ընթացքում կուսակցության առաջնորդ Օզգյուր Օզելն է դարձել ընդդիմության դեմքը։

Այնուամենայնիվ, մայիսին Անկարայի դատարանը չեղյալ  է հայտարարել CHP-ի 2023 թվականի ղեկավարի ընտրությունները՝ ենթադրյալ ընտրակաշառքի պատճառով և վերականգնել նախկին նախագահ Քեմալ Քըլըչդարօղլուին, որը բողոք է բարձրացրել կուսակցության ներսում։

Դատարանի որոշմամբ կուսակցության ղեկավարի պաշտոնից հեռացված Էրդողանի քննադատ Օզելը կոչ է արել արտահերթ համագումար անցկացնել՝ ասելով, որ կուսակցությունը չի կարող կառավարվել պարտադրված ղեկավարության կողմից։ Այս շաբաթ CHP-ի ավելի քան 800 պատվիրակներ միջնորդագրեր են ներկայացրել՝ կոչ անելով համագումարին կուսակցության առաջնորդ ընտրել։ Սակայն քաղաքական դիտորդները նշում են, որ Քըլըչդարօղլուն կփորձի խոչընդոտել համագումարը և կանխել իր ղեկավարությանը մարտահրավեր նետելու ցանկացած փորձ։

Թարգմանությունը՝ Էմմա Չոբանյանի