06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Հունգարիայի վարչապետը հայտարարել է, որ իր նախաձեռնությամբ ԵՄ գագաթնաժողովի հռչակագրից հանվել է Ուկրաինայի արագացված անդամակցության մասին դրույթը
Քաղաքականություն
19.06.2026 | 20:19
Հունգարիայի վարչապետ Պետեր Մագյարը հայտարարել է, որ իր նախաձեռնությամբ Բրյուսելում ԵՄ գագաթնաժողովի հռչակագրից վերջին պահին բացառվել է Ուկրաինայի արագացված անդամակցության մասին դրույթը։ Նա ասել է, որ հունգարական առաջարկով տեքստի վրա աշխատանքի ընթացքում վերջնական փաստաթուղթը «զգալիորեն վերանայվել է», և «դա հեշտ չէր», գրում է Current time-ը։
«Սա է պատահում, երբ մեկը գալիս է ոչ միայն սպառնալու և վախ սերմանելու, այլև փոխզիջում գտնելու»,- գրել է Մագյարը X սոցիալական ցանցում։
Հունիսին ԵՄ-ն հաստատել էր վեց բանակցային կլաստերներից առաջինի՝ «Հիմունքների» բացումը։ Անդամակցության շուրջ բանակցությունների փաթեթն ընդգրկում է 35 գլուխներ, որոնք ուրվագծում են ուկրաինական օրենսդրությունը ԵՄ չափանիշներին համապատասխանեցնելու համար անհրաժեշտ օրենսդրական փոփոխությունները, ներառյալ՝ իրավունքի գերակայության, դատական անկախության և կոռուպցիայի դեմ պայքարի հարցեր։
Ուկրաինայի նախագահ Վլադիմիր Զելենսկին հայտարարել է, որ Եվրոպական խորհրդի նիստից առաջ ինքը կառույցի ղեկավար Անտոնիո Կոշտայի և Եվրոպական հանձնաժողովի նախագահ Ուրսուլա ֆոն դեր Լեյենի հետ քննարկել է ԵՄ-ին Ուկրաինայի անդամակցության հետագա քայլերը:
«Կարևոր է հնարավորինս շուտ բացել մնացած հինգ բանակցային կլաստերները: Մենք շուտով ակնկալում ենք ստանալ ԵՄ ֆինանսական աջակցության փաթեթի առաջին մասնաբաժինը՝ մեր պաշտպանությունն ամրապնդելու համար»,- նշել է նա։
Ավելի վաղ, Մագյարը լրագրողներին ասել էր, որ գոհ է ԵՄ Խորհրդի կողմից առաջին կլաստերը բացելու որոշումից, սակայն կասկածներ ունի մնացած կլաստերների վերաբերյալ։
«Մենք հարցեր ունենք, և ոչ միայն մենք, այն մասին՝ արդյո՞ք պետք է անմիջապես սկսենք բանակցությունները մնացած կլաստերների վերաբերյալ առաջին կլաստերի բացումից անմիջապես հետո։ Այս կարծիքը, անկեղծ ասած, շատ վիճահարույց է այլ պետությունների շրջանում»,- ասել է նա։
Կիևը ԵՄ անդամակցության հայտ ներկայացրել է 2022 թվականին՝ Ռուսաստանի լայնածավալ ներխուժման սկսվելուց մի քանի շաբաթ անց, և շուտով ստացել թեկնածու երկրի կարգավիճակ։ Սակայն պաշտոնական բանակցությունների մեկնարկն արգելափակվում էր Հունգարիայի այն ժամանակվա վարչապետ Վիկտոր Օրբանի կառավարության կողմից։ 2026 թվականի ապրիլին նա պարտվեց ընտրություններում՝ տեղը զիջելով Պետեր Մագյարին։
Թարգմանությունը՝ Էմմա Չոբանյանի
