Պեսկովը՝ Մոսկվայի վրա ուկրաինական ԱԹՍ-ների զանգվածային հարձակման մասին

Մոսկվայի մարզում ՀՕՊ համակարգն աշխատանքի  բարձր ցուցանիշներ է ցուցադրել՝ «չնայած ամեն ինչին»։ Այս մասին հայտարարել է ՌԴ նախագահի խոսնակ Դմիտրի Պեսկովը՝ միայն մեկ օր անց մեկնաբանելով նախօրեին Մոսկվայի և Մոսկվայի մարզի վրա ուկրաինական ԱԹՍ-ների զանգվածային հարձակումը, գրում է BBC-ի ռուսական ծառայությունը։

Նա, սակայն, չի մանրամասնել, թե ինչ նկատի ունի՝ «չնայած ամեն ինչին» ասելով։

Երեկ Ռուսաստանի իշխանություններն այդպես էլ չէին հայտնել Մոսկվայի մարզի վրա հարձակված անօդաչու թռչող սարքերի ճշգրիտ թիվը կամ հարվածի ենթարկված վայրերի քանակը: Մոսկվայի մարզի նահանգապետ Անդրեյ Վորոբյովը երեկ հայտնել էր 17 տուժածի մասին, սակայն այսօր պարզաբանել է, որ մահացել է նաև 8-ամյա աղջիկ:

Պեսկովը հավելել է, որ ՌԴ նախագահ Վլադիմիր Պուտինը հարձակումների մասին հաղորդագրություններ է ստանում «կանոնավոր կերպով, օրը մի քանի անգամ»։ Կրեմլի խոսնակը չի մանրամասնել, թե ինչու ՌԴ  նախագահը հրապարակավ չի արձագանքել իրադարձություններին։ Պուտինը երեկ մասնակցել է Կազանում կայացած Ռուսաստան-ԱՍԵԱՆ գագաթնաժողովին և, ի թիվս այլ բաների, հայտարարություններ է արել լրատվամիջոցների համար։

Մայրաքաղաքի վրա անօդաչու թռչող սարքերի հարձակումների վերաբերյալ հարցին պատասխանելիս Պեսկովը հայտարարել է, որ Ռուսաստանի կողմից Ուկրաինային պատասխան հարվածները կշարունակվեն, իսկ լրագրողներին առաջարկել «Ուկրաինայից ավելի շատ կադրեր փնտրել ռուսական զինված ուժերի կողմից հարվածների արդյունքների վերաբերյալ»։

Մոսկվայի քաղաքապետ Սերգեյ Սոբյանինը հայտնել է, որ հունիսի 19-ին ՀՕՊ ուժերը խոցել են Ռուսաստանի մայրաքաղաքի ուղղությամբ թռչող 16 ուկրաինական անօդաչու թռչող սարքեր։ Որոշ ժամանակ անց նա հայտարարել է, որ Մոսկվային մոտենալիս խոցվել է ևս ինը անօդաչու թռչող սարք։ Տեղի ժամանակով 13:42-ին նա հայտնել է, որ ոչնչացվել է ևս 10 անօդաչու։ Այսպիսով, խոցված անօդաչու թռչող սարքերի ընդհանուր թիվը հասել է 35-ի։

Թարգմանությունը՝ Էմմա Չոբանյանի