06.09.2026 | 19:29
Գազամատակարարման վթարային դադարեցում Լոռիում
Ադրբեջանի տնտեսությունը լճանում է․ տնտեսական աճն այս տարվա առաջին հինգ ամիսներին կազմել է 0%
Քաղաքականություն
19.06.2026 | 21:54
Մինչ 2026 թվականի առաջին հինգ ամիսներին Ադրբեջանը բախվել է լիակատար մակրոտնտեսական լճացման և գրանցել զրոյական ՀՆԱ աճ՝ նավթի և գազի ոլորտի անկման պատճառով, մյուս երկրներն արագ աճ են ցուցաբերել, գրում են ադրբեջանական լրատվամիջոցները։
Նշվում է, որ Ադրբեջանի զրոյական արդյունքի համեմատ՝ Ուզբեկստանը դարձել է տարածաշրջանի անվիճելի առաջատարը՝ 7,9 տոկոս տնտեսական աճով։ Վրաստանն ու Հայաստանը գրանցել են գրեթե նույնքան բարձր աճի տեմպեր, համապատասխանաբար, 7,3 և 7,1 տոկոս։
Ղազախստանը նույնպես գրանցել է չափավոր, բայց կայուն աճ՝ 3,7 տոկոսով։ Վերջին վիճակագրությունը հստակորեն հաստատում է, որ մինչ Ադրբեջանը դոփում է տեղում, հարևան երկրների տնտեսությունները կայուն առաջընթաց են գրանցում, նշում են տեղական լրատվականները։
Ադրբեջանի Պետական վիճակագրական կոմիտեի տվյալներով՝ 2026 թվականի հունվար-մայիս ամիսներին Ադրբեջանի տնտեսությունում աճ չի գրանցվել։ Կոմիտեի կողմից հրապարակված ամսական մակրոտնտեսական ցուցանիշների համաձայն՝ տարվա առաջին հինգ ամիսներին արտադրվել է 51 միլիարդ 783,8 միլիոն մանաթ համախառն ներքին արդյունք (ՀՆԱ)։ Այս ցուցանիշը նախորդ տարվա նույն ժամանակահատվածի համեմատ չի փոխվել։ Տարվա առաջին եռամսյակում ՀՆԱ-ն նվազել է 0,3 տոկոսով։ Ապրիլին տնտեսական աճը կազմել է 0,2 տոկոս՝ մասամբ կասեցնելով տնտեսության անկումը։ Սակայն հինգ ամսվա արդյունքները ցույց են տալիս, որ ընդհանուր տնտեսական լճացումը շարունակվում է։
Նավթի և գազի ոլորտում ՀՆԱ-ի ծավալի բացասական միտումը շարունակվում է։ Այսպիսով, Պետական վիճակագրական կոմիտեի տվյալներով՝ 2026 թվականի հունվար-մայիս ամիսներին այս ոլորտում արտադրվել է 16,1 միլիարդ մանաթի արտադրանք, ինչը 1 տոկոսով պակաս է նախորդ տարվա նույն ժամանակահատվածի համեմատ։
Ոչ նավթային և գազային ոլորտում ՀՆԱ-ն կազմել է 35,6 միլիարդ մանաթ։ Այս ոլորտում իրական աճը կազմել է 0,4 տոկոս։ Սակայն, 2025 թվականի արդյունքների համաձայն, ոչ նավթային ոլորտում տնտեսական աճը կազմել է ավելի քան 6 տոկոս։
Այս ցուցանիշները վկայում են արտադրանքի արտադրության թուլացման մասին ինչպես նավթային, այնպես էլ ոչ նավթային ոլորտներում։
Թարգմանությունը՝ Էմմա Չոբանյանի
