Իրանը կհակազդի TRIPP-ին. գլխավոր հարցն այն է՝ ինչ միջոցներով․ Նիկիտա Սմագին․ ՏԵՍԱՆՅՈՒԹ

«ԱՄՆ-ն չհաղթեց, իսկ Իրանը կանգուն մնաց»,- Factor TV-ին տված հարցազրույցում այս մասին հայտարարեց արևելագետ Նիկիտա Սմագինը:

Փորձագետի խոսքով՝ Իրանի դեմ ռազմական արշավին չնայած՝ Միացյալ Նահանգները չի կարողացել հասնել իր նպատակներին, և Դոնալդ Թրամփի վարչակազմն այժմ շահագրգռված է հակամարտության արագ ավարտով։

Ըստ Սմագինի՝ Վաշինգտոնը ոչ միայն չի կարողացել հասնել ցանկալի արդյունքների, այլև ստիպված է եղել Թեհրանի հետ բանակցել նոր պայմանների շուրջ, այդ թվում՝ Հորմուզի նեղուցի։

Արևելագետի խոսքով՝ Իսրայելը պատրաստ չէ դադարեցնել հակամարտությունը, մինչդեռ ԱՄՆ-ը ձգտում է դուրս գալ դրանից, քանի որ պատերազմի շարունակությունը քաղաքական օգուտներ չի բերում Թրամփի վարչակազմին: Միաժամանակ, նրա գնահատմամբ, որ Իրանը պատրաստ է իրադարձությունների զարգացման տարբեր սցենարների, այդ թվում՝ հետագա սրման։

Նիկիտա Սմագինը նաև կարծում է, որ պատերազմը հանգեցրել է էական փոփոխությունների Իրանի քաղաքական համակարգում: Նրա խոսքով՝ Իսլամական հեղափոխության պահապանների կորպուսն (ԻՀՊԿ) աստիճանաբար դառնում է որոշումների կայացման հիմնական կենտրոն, մինչդեռ քաղաքացիական ինստիտուտների ազդեցությունը նվազում է։ Փորձագետը նշեց, որ պատերազմի ավարտից հետո Իրանի իշխանությունների համար հիմնական սպառնալիքը կլինի սոցիալ-տնտեսական իրավիճակի վատթարացումը։

Նրա խոսքով՝ միայն այս տարվա գարնանն առնվազն երկու միլիոն իրանցի կորցրել է աշխատանքը։ Սմագինն ընդգծեց, որ իրանական հասարակությունում պահպանվում են բողոքի ուժեղ տրամադրությունները, սակայն կազմակերպչական կառույցների և ընդունված առաջնորդների բացակայությունը խանգարում է բողոքի շարժմանը հասնել նշանակալի քաղաքական արդյունքների։

Խոսելով Հարավային Կովկասի մասին՝ արևելագետը նշեց, որ ճգնաժամի ամենասուր փուլի ավարտից հետո Թեհրանը կվերադառնա տարածաշրջանային օրակարգին և, ամենայն հավանականությամբ, դեմ հանդես կգա TRIPP նախագծին։ Ըստ նրա՝ հարցն այն չէ՝ արդյո՞ք Իրանը կդիմադրի նախագծին, այլ այն, թե ինչ մեթոդներ կօգտագործի դա անելու համար։

Հարցազրույցն ամբողջությամբ՝ տեսանյութում։

Սամվել Մելիքսեթյան