Խաղաղ օվկիանոսում սկսվել է Էլ Նինյո կլիմայական երևույթը. այն կարող է փոխել եղանակն ամբողջ աշխարհում

ԱՄՆ-ի Օվկիանոսային և մթնոլորտային հետազոտությունների ազգային վարչության (NOAA) օդերևութաբանները հայտարարել են, որ Խաղաղ օվկիանոսում սկսվել է Էլ Նինյո բնական երևույթը, որը առաջիկա շաբաթներին կարող է զգալիորեն փոխել եղանակային պայմանները աշխարհի տարբեր տարածաշրջաններում։

Մասնագետների գնահատմամբ՝ այս անգամ Էլ Նինյոն կարող է դառնալ վերջին 140 տարվա ընթացքում գրանցված ամենահզորներից մեկը։ «Կա իրական հավանականություն, որ սա կլինի ամենաուժեղ Էլ Նինյոն վերջին 140 տարվա ընթացքում», – նշել է պրոֆեսոր Փոլ Ռաունդին։

Էլ Նինյոն կլիմայական երևույթ է, որը կրկնվում է միջինը յուրաքանչյուր 2-7 տարին մեկ։ Այն կապված է Խաղաղ օվկիանոսի որոշ հատվածներում ջրի ջերմաստիճանի տատանումների հետ և կարող է լուրջ ազդեցություն ունենալ ամբողջ մոլորակի կլիմայի վրա։

Այս երևույթի հետևանքները տարբեր տարածաշրջաններում տարբեր կերպ են արտահայտվում։ Կենտրոնական Ամերիկայի, Ասիայի, Աֆրիկայի և Ավստրալիայի մի շարք շրջաններում սովորաբար դիտվում են ավելի շոգ և չոր պայմաններ, մինչդեռ Հարավային Ամերիկայի խաղաղօվկիանոսյան ափամերձ որոշ տարածքներում Էլ Նինյոն բերում է հորդառատ անձրևներ և ավերիչ ջրհեղեղներ։

Գերմանական DW-ին տված հարցազրույցում Գոդարդի տիեզերական հետազոտությունների ինստիտուտի (GISS) տնօրեն Գևին Շմիդտը նշել է, որ արևադարձային գոտիներում մթնոլորտային փոփոխությունները կարող են ազդեցություն ունենալ նաև հազարավոր կիլոմետրեր հեռու գտնվող շրջանների վրա։

«Սա նման է գլոբալ շղթայական ռեակցիայի մեկնարկի, որտեղ Էլ Նինյոն առաջին ընկնող դոմինոյի քարն է», – ընդգծել է գիտնականը։

Փորձագետների կարծիքով՝ Էլ Նինյոն հաճախ կապված է գյուղատնտեսական բերքատվության նվազման, բնական աղետների և տնտեսական մեծ կորուստների հետ, որոնք որոշ դեպքերում կարող են հասնել տրիլիոնավոր դոլարների։ Միևնույն ժամանակ, այս երևույթի կարևոր առավելություններից մեկն այն է, որ այն հնարավոր է կանխատեսել մի քանի ամիս առաջ, ինչը կառավարություններին և բնակչությանը հնարավորություն է տալիս նախապես պատրաստվել հնարավոր հետևանքներին։

Մանրամասները՝ սկզբնաղբյուրում։