Անվավեր ճանաչեցին, որպեսզի ԲՀԿ-ն դուրս մնա խորհրդանից. պատգամավորի թեկնածու․ ՏԵՍԱՆՅՈՒԹ

Կենտրոնական ընտրական հանձնաժողովի կողմից երկու ընտրատեղամասերի քվեարկության արդյունքների անվավեր ճանաչումն ակնհայտ քաղաքական որոշում է, որի միակ նպատակը «Բարգավաճ Հայաստան» կուսակցությանը խորհրդարանից դուրս մղելն է: Այս մասին ԿԸՀ շենքի մոտ տեղի ունեցած բողոքի ակցիայի ժամանակ լրագրողների հետ զրույցում հայտարարեց ԲՀԿ պատգամավորի թեկնածու Սուրեն Սուրենյանցը:

Նրա խոսքով՝ չորս տեղամասերում իրականացված վերահաշվարկի արդյունքում ԲՀԿ-ն հետ էր բերել 200-ից ավելի քվե և մտնելու էր նոր խորհրդարան:

«Մեր մոտ եղած արձանագրություններով արդեն մենք վստահ խորհրդարանում ենք, և եթե չլիներ այդ երկու տեղամասի արդյունքների չեղարկումը, վստահաբար հայտնվելու էինք ԱԺ-ում»,- նշեց Սուրենյանցը:

Պատգամավորի թեկնածուն ընդգծեց, որ իրենք չեն վիճարկում ԿԸՀ-ի՝ տեղամասային խախտումների հիման վրա արդյունքներն անվավեր ճանաչելու օրինական իրավունքը, սակայն Ընտրական օրենսգրքի 101-րդ հոդվածի համաձայն՝ եթե այդ որոշումն էապես ազդում է ընդհանուր արդյունքների վրա, ապա հանձնաժողովը պարտավոր էր նշանակել կրկնակի քվեարկություն:

«Եթե կրկնակի քվեարկություն չեն նշանակում, նշանակում է՝ ակնհայտորեն միտում կա ԲՀԿ-ին դուրս թողնել խորհրդարանից»,- հայտարարեց Սուրենյանցը: Նա նաև հավելեց, որ իշխանությունն այս քայլով ձգտում է խորհրդարանում ապահովել սեփական ուժի 3/5 մեծամասնությունը, որպեսզի կարողանա միայնակ սահմանադրական օրենքներ ընդունել և պաշտոններում նշանակումներ կատարել:

Սուրենյանցը զգուշացրեց, որ իրենք օգտագործելու են քաղաքական ու իրավական ողջ գործիքակազմը, ներառյալ՝ արդյունքների դատական բողոքարկումը, իսկ ակցիաները լինելու են շարունակական:

Մանրամասները՝ տեսանյութում։