Հայաստանը քայլեր է ձեռնարկում արժանապատիվ աշխատանքի ապահովման ուղղությամբ․ փոխնախարար

Ժնևում անցկացվում է Աշխատանքի միջազգային համաժողովի 114-րդ նստաշրջանը, որին մասնակցում են ԱՄԿ 187 անդամ երկրները ներկայացնող պատվիրակություններ, այդ թվում՝ Հայաստանի ներկայացուցիչները։ Աշխատանքի և սոցիալական հարցերի նախարարությունից հայտնում են, որ փոխնախարար Լուսինե Քոչարյանն իր ելույթում ընդգծել է, որ Հայաստանը շարունակում է քայլեր իրականացնել աշխատանքային իրավունքի պաշտպանության, կայուն զբաղվածության և արժանապատիվ աշխատանքի ապահովման ուղղությամբ։

«Աշխատանքի միջազգային կազմակերպության (ԱՄԿ) 187 անդամ երկրները ներկայացնող պատվիրակությունների մասնակցությամբ Ժնևում անցկացվում է Աշխատանքի միջազգային համաժողովի 114-րդ նստաշրջանը։

Նստաշրջանին մասնակցում են Աշխատանքի և սոցիալական հարցերի նախարարի տեղակալ Լուսինե Քոչարյանը, Հայաստանի արհմիությունների կոնֆեդերացիայի նախագահ Էլեն Մանասերյանը, Հայաստանի գործատուների հանրապետական միության նախագահ Վահագն Համբարձումյանը, Միասնական սոցիալական ծառայության պետի տեղակալ Լիանա Թովմասյանը, տարբեր երկրների բարձրաստիճան պաշտոնյաներ, քաղաքականություն մշակողներ, փորձագետներ։

Օրակարգում ներառված են արժանապատիվ աշխատանքի ապահովման գործում արհեստական բանականության հնարավորությունների կիրառման, աշխատանքում գենդերային հավասարության ապահովման և սոցիալական երկխոսության զարգացմանն առնչվող մի շարք թեմաներ։
Իր ելույթում Լուսինե Քոչարյանն ընդգծել է, որ Հայաստանի Հանրապետությունը հավատարիմ լինելով որդեգրած արժեքներին և սկզբունքներին՝ շարունակում է իրականացնել անհրաժեշտ քայլեր՝ աշխատանքային իրավունքի պաշտպանության, ինչպես նաև կայուն զբաղվածության և արժանապատիվ աշխատանքի ապահովման օրակարգի արդյունավետ իրականացման ուղղությամբ: Նախարարի տեղակալը նշել է, որ աշխատանքային օրենսդրության ընթացիկ բարեփոխումների հիմքում գործատուների և աշխատողների շահերի պաշտպանությանն ուղղված արդար և հավասարակշռված շրջանակի ձևավորման ռազմավարական նպատակն է։

Լուսինե Քոչարյանը նաև շեշտել է, որ Հայաստանը վերանայում է գործատուների և արհմիությունների գործունեությունը կարգավորող օրենսդրական շրջանակը՝ բոլոր մակարդակներում սոցիալական գործընկերության մեխանիզմները ամրապնդելու և խորացնելու նպատակով։ Այս համատեքստում անդրադարձ է կատարվել ներառական և արժանապատիվ աշխատանքային միջավայրի ձևավորման, աշխատանքային պայմանագրերի թվայնացման գործընթացներին, ինչպես նաև հաշմանդամություն ունեցող անձանց և 63 տարեկանից բարձր քաղաքացիների զբաղվածության խթանման ուղղությամբ իրականացվող աշխատանքներին»,- ասված է հաղորդագրությունում։