Նախընտրական բանավեճի ճիշտ ու սխալ պնդումները․ Փաստերի ստուգման թարմացվող լրահոս

Factor TV-ն ուշադրությամբ հետևում է նախընտրական բանավեճի ընթացքին և առանձնացնում է այն պնդումները, որոնք կասկածելի են և կարող են ստուգվել Փաստերի ստուգման գործիքներով և մեթոդներով։

Սկզբում տրվում է պնդումն անողի պնդումը, ապա դրա ստուգումը։ Այնուհետև տրվում է ստուգման արդյունքում պարզված փաստը և այն համադրվում է պնդման հետ։ Բոլոր դեպքերում չէ, որ պնդումը կարող է ճիշտ կամ սխալ լինել․ որոշ դեպքերում ստուգման արդյունքում տրամադրում ենք բացատրություն կամ պարզաբանում։

Ծայրահեղ աղքատության մասին

Նիկոլ Փաշինյան, «Քաղաքացիական պայմանագիր» կուսակցություն․

Պնդումը․ «Հայաստանի Հանրապետությունից, ըստ էության, ծայրահեղ աղքատությունը արմատախիլ է արված»։

ՀՀ ՎԿ ամենաթարմ տվյալներով, որոնք վերաբերում են 2024 թվականին, Հայաստանում ծայրահեղ աղքատ է բնակչության 0,6 տոկոսը կամ 18,5 հազար մարդ։

Ապօրինի ծագում ունեցող գույքի վերադարձի մասին

Նիկոլ Փաշինյան, «Քաղաքացիական պայմանագիր» կուսակցություն․

Պնդում Ա․ «Հայկական կապիտալը, որ թալանի միջոցով հոսում էր պատերազմի եռագլուխ կուսակցության գրպանները, 18 թվից 6,6 միլիարդ դոլար հանվել է նրանց գրպանից և ուղղվել է պետական բյուջե։ Ապօրինի գույքի բռնագանձման մեխանիզմով և հարկային և այլ մեխանիզմներով 8 միլիարդ դոլարի գումար վերադարձվել է պետությանը»։

Պնդում Բ․ «Ապօրինի գույքի, համայնքային մեխանիզմով 2018 թվականից մինչև օրս 770 միլիոն դոլարի գույք և դրամական միջոցներ վերադարձվել են պետությանը»։

ՀՀ գլխավոր դատախազը մայիսին Ազգային ժողովում դատախազության նախորդ տարվա աշխատանքները ներկայացնելիս նշել է, որ 2020-2025 թվականների ընթացքում դատախազության՝ ապօրինի ծագում ունեցող գույքի բռնագանձման լիազորության շրջանակում, հօգուտ Հայաստանի Հանրապետության բռնագանձվել է 5 միլիարդ 450 միլիոն 494 հազար 148 դրամի գույք և դրամական միջոց, որը համարժեք է շուրջ 14 միլիոն 464 հազար ԱՄՆ դոլարի:

Ինչ վերաբերում է 2018-2019 թվականներին, ապա այդ ժամանակահատվածում ապօրինի ծագում ունեցող գույքի բռնագանձման մասին օրենք չի եղել։ Այն ուժի մեջ է մտել 2020 թվականի ապրիլին։

Աղքատության ցուցանիշի մասին

Նարեկ Կարապետյան, «Ուժեղ Հայաստան» դաշինք․ Պնդումը․ «Մեր երկրում այսօր 650 հազար մարդ ապրում է աղքատության մեջ»։

Աղքատության մասին ՀՀ վիճակագրական կոմիտեի ամենաթարմ տվյալները վերաբերում են 2024 թվականին։ Մայիսի 26-ին հրապարակված տվյալներով՝ 2024 թվականին աղքատ է եղել Հայաստանի բնակչության 21,7 տոկոսը։

2025 թվականի հունվարի 1-ի դրությամբ Հայաստանի բնակչությունը, նույն ՀՀ ՎԿ տվյալներով, եղել է 3 միլիոն 76,2 հազար մարդ։ Դրա 21,7 տոկոսը կկազմի 667 հազար 535 մարդ։ Այսինքն Կարապետյանի նշած թիվը շատ մոտ է պաշտոնական թվին։

Գարիկ Հարությունյան