ՌԴ Կենտրոնական բանկն ուկրաինական ԱԹՍ-ներ խոցելու լիազորություն է ստացել 

ՌԴ Պետդուման օրենք է ընդունել Կենտրոնական բանկի, Սբերբանկի և Ռուսաստանի ինկասատորների ասոցիացիայի օբյեկտները անօդաչու թռչող սարքերից պաշտպանելու մասին։ Այն թույլ կտա  ինկասատորների աշխատակիցներին ինքնուրույն խոցել անօդաչու թռչող սարքերը, հաղորդում է Reuters-ը, որին վկայակոչում է BBC-ի ռուսական ծառայությունը։

Նախկինում նման լիազորություններով օժտված էին գերատեսչական անվտանգության մարմինները (օրինակ՝ տրանսպորտային, էներգետիկ կամ արդյունաբերական օբյեկտներում) և անվտանգության ոլորտի մասնավոր ընկերությունները: Գործակալությունը նշում է, որ գարնանն ուկրաինական անօդաչու թռչող սարքերի հարձակումների ինտենսիվությունն աճել է։

Պետդումայի ֆինանսական շուկաների հանձնաժողովի ղեկավար Անատոլի Ակսակովն ասել է, որ Կենտրոնական բանկի պահպանվող օբյեկտների աշխատակիցներն ու ինկասատորները կկարողանան խլացնել ազդանշանները և հետ մղել անօդաչու թռչող սարքերի հարձակումները:

«Գումարած սրան՝ միջոցներ կիրառել այդ անօդաչու թռչող սարքերը խփելու և համապատասխան օբյեկտները պաշտպանելու համար։ Նրանք իրենք կվճարեն: Եթե խոսքը Կենտրոնական բանկի մասին է, ապա Կենտրոնական բանկի, եթե խոսքը Սբերբանկի մասին է, ապա Սբերբանկը կվճարի»,- նրա խոսքերն է մեջբերում Reuters-ը:

Երեքշաբթի ՌԴ նախագահ Վլադիմիր Պուտինի հետ հանդիպման ժամանակ Ռուսաստանի արդյունաբերողների և ձեռնարկատերերի միության ղեկավար Ալեքսանդր Շոխինը կոչ էր արել ավելի սերտ համագործակցություն հաստատել բիզնեսի և կառավարության միջև՝ ընկերություններին անօդաչու թռչող սարքերից պաշտպանելու համար, մասնավորապես, զենքի, այդ թվում՝ ռադիոէլեկտրոնային պայքարի համակարգերի և լազերային համակարգերի ձեռքբերման հարցը լուծելու միջոցով: Նա նշել էր, որ բիզնեսները պատրաստ են ֆինանսավորել այս աշխատանքը։