Հարավային Կովկասն այլևս չպետք է պատերազմի և բախման տարածք լինի. Հիքմեթ Հաջիև

Հարավային Կովկասն այլևս չպետք է լինի պատերազմի և բախման տարածք։ Բաքվում WUF13-ի շրջանակում կազմակերպված միջոցառման ժամանակ այս մասին հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության վարչության պետ Հիքմեթ Հաջիևը։

Նա նշել է, թե հակամարտությունն այժմ անցյալում է, և Ադրբեջանը բախվում է նոր իրողությունների։

«2024 թվականի դրությամբ՝ պատերազմն ու հակամարտությունն արդեն ավարտվել են: Հարավային Կովկասն այլևս չպետք է լինի պատերազմի և բախման տարածք: Ադրբեջանը վերականգնել է իր տարածքային ամբողջականությունն ու ինքնիշխանությունը»,- հայտարարել է Ալիևի օգնականը։

Ըստ նրա՝ նաև առաջ է քաշվել նախաձեռնություն՝ Ադրբեջանի և Հայաստանի միջև խաղաղության համաձայնագիր կնքելու համար, իսկ անցյալ տարի կայացած Վաշինգտոնի գագաթնաժողովը բարենպաստ աշխարհաքաղաքական պայմաններ է ստեղծել տարածաշրջանում կայուն խաղաղություն և անվտանգություն հաստատելու համար:

Բացի այդ`իր խոսքում Հաջիևը Ադրբեջանի քարոզչական թեզերն է հնչեցրել, թե իբր Հայաստանից 300,000 ադրբեջանցի է արտաքսվել։

«Տեղահանված անձանց տեղավորման հետ կապված խնդիրներն ավելի էին բարդանում։ Քանի որ Ադրբեջան էին  ժամանել նաև Հայաստանից արտաքսված 300,000 էթնիկ ադրբեջանցի փախստականներ», – հայտարարել է նա`խոսելով Արցախյան հակամարտության ադրբեջանցի փախստականների մասին։

Նշենք, որ 1979 թվականի ԽՍՀՄ մարդահամարի տվյալներով՝ Խորհրդային Հայաստանում ադրբեջանցիների թիվը անցել  160 հազարից,սակայն չի եղել 300,000։

Թարգմանությունը՝ Էմմա Չոբանյանի