Քաղաքականություն
19.05.2026 | 10:35
ԱՄՆ նախագահ Դոնալդ Թրամփը հայտարարել է, որ հրաժարվել է մայիսի 19-ին Իրանի վրա նախատեսված հարվածներից՝ Կատարի, Սաուդյան Արաբիայի և ԱՄԷ-ի առաջնորդների խնդրանքով։ Նա այս մասին գրել է իր Truth Social սոցիալական ցանցում, գրում է Current time-ը։
«Նշված առաջնորդների նկատմամբ հարգանքից ելնելով՝ ես հրահանգել եմ պատերազմի նախարար Փիթ Հեգսեթին, Շտաբի պետերի միացյալ կոմիտեի նախագահ, գեներալ Դեն Քեյնին և Միացյալ Նահանգների զինված ուժերին, որ չենք իրականացնի վաղը նախատեսված հարձակումը Իրանի վրա: Բայց նաև հրահանգել եմ նրանց պատրաստ լինել Իրանի վրա լայնածավալ հարձակման, եթե ընդունելի համաձայնագիր չկնքվի»,- գրել է Թրամփը։
Նրա խոսքով՝ շուտով կկնքվի համաձայնագիր, որով Թեհրանը չի կարողանա միջուկային զենք ունենալ։
Ավելի վաղ Axios-ը և CNN-ը հայտնել էին, որ Թրամփը շուտով իր թիմի հետ կքննարկի Իրանի դեմ ԱՄՆ նոր ռազմական գործողությունների տարբերակները։ Հանդիպումը նախատեսված է մայիսի 19-ին, հաղորդում է Axios-ը՝ հղում անելով երկու ամերիկացի պաշտոնյաների։
Ըստ լրատվամիջոցների՝ Թրամփը կհանդիպի իր ազգային անվտանգության թիմի հետ։ Այլ մանրամասներ չեն տրամադրվում։
The New York Times-ը գրել էր, որ մայիսին Թրամփի մերձավոր օգնականները պատրաստել են Իրանին նոր հարվածներ հասցնելու ծրագրեր, եթե Սպիտակ տունը որոշի սրել հակամարտությունը։ Առաջարկվող տարբերակների թվում են իրանական ռազմական օբյեկտների լայնածավալ ռմբակոծությունը, ինչպես նաև հարստացված ուրանն Իրանից դուրս բերելու ցամաքային գործողությունը։
Թարգմանությունը՝ Էմմա Չոբանյանի
