25.06.2026 | 10:45
«Միասնության թևերը» ընտրությունների գործով երրորդ անձ ներգրավվելու կոչ է արել մի շարք կուսակցությունների
ՌԴ ռազմական հրամանատարությունը Պուտինին համոզել է, որ մինչև աշուն կավարտի ամբողջ Դոնբասի գրավումը. FT
Քաղաքականություն
13.05.2026 | 14:44
Ռուսաստանի ռազմական հրամանատարությունը երկրի նախագահ Վլադիմիր Պուտինին համոզել է, որ մինչև աշուն կավարտի ամբողջ Դոնբասի գրավումը, հաղորդում է Financial Times-ը՝ հղում անելով Ռուսաստանի առաջնորդի հետ կապի մեջ գտնվող երկու աղբյուրների, իրավիճակին ծանոթ երկու անձանց և ուկրաինական հետախուզության գնահատականին: Երեք աղբյուրների համաձայն՝ Դոնբասի հնարավոր գրավումից հետո Պուտինը ծրագրում է «բարձրացնել ցանկացած հրադադարի գինը», գրում է Current time-ը:
Ուկրաինայի Պաշտպանության նախարարության գլխավոր հետախուզական վարչության պետի տեղակալ Վադիմ Սկիբիցկին կարծում է, որ Դոնբասում հաջողությունը թույլ կտա Կրեմլին ներկայացնել հետագա տարածքային պահանջներ՝ ՌԴ-ին փոխանցել Զապորոժիեի և Խերսոնի շրջանները, որոնց զգալի մասը մնում է Ուկրաինայի վերահսկողության տակ։
Դոնբասը գրավելու Պուտինի ցանկությունը, ըստ երկու աղբյուրների, ուժեղանում է՝ չնայած նրան, որ պատերազմի սկզբնական փուլում նա մասնավոր կարգով պատրաստակամություն է հայտնել սառեցնել ռազմական գործողությունները ներկայիս առաջնագծում։
«Ես անընդհատ պնդում եմ, որ նա կանգ առնի ներկայիս առաջնագծում։ Բայց նա միշտ ասում է՝ «Ոչ, ես չեմ կարող փոխզիջման գնալ»»,- ասել է աղբյուրներից մեկը։
Պատերազմը դադարեցնելու հարցով ոչ պաշտոնական բանակցություններին մասնակցող երկու աղբյուրներ կարծում են, որ Պուտինի «իրական հավակնությունները», հավանաբար, դեռևս Ուկրաինայի մեծ մասի, այդ թվում՝ Դնեպրի, Կիևի և Օդեսայի նկատմամբ վերահսկողություն հաստատելու մեջ են։
«Հիշե՛ք, որ ծրագիրը միշտ էլ Կիևը գրավելն էր։ Նպատակը դրված է և այն պետք է իրականացվի։ Նրան ասում են, որ ուկրաինացիները դժվարություններ են ունենում, նրանց ճակատը փլուզվում է, և նրանք սպառել են մարդկանց»,- ասել է աղբյուրը։
Բանակցությունների վերաբերյալ աղբյուրներն ասել են, որ Ուկրաինան և Ռուսաստանը կարծում են՝ ԱՄՆ-ի միջնորդությամբ խաղաղ բանակցությունների վերսկսման հեռանկարները փոքր են նույնիսկ Մերձավոր Արևելքում պատերազմի ավարտից հետո։
Մայիսի 12-ին, պատասխանելով լրագրողների հարցերին, ԱՄՆ նախագահ Դոնալդ Թրամփը հայտարարել էր, որ ինքը Պուտինի հետ որևէ համաձայնություն չունի այն մասին, որ Ռուսաստանը կստանա «ամբողջ Դոնբասը»։ Նա նաև ենթադրություն էր հայտնել, որ կարող է այս տարի այցելել Ռուսաստան՝ նշելով, որ կանի «ամեն ինչ», որպեսզի դադարեցնի Ուկրաինայում պատերազմը։
Թրամփը կարծիք էր հայտնել, որ պատերազմի ավարտը մոտ է։ Սակայն, Financial Times-ի հետ զրուցած աղբյուրների համաձայն, կողմերից ոչ մեկը իմաստ չի տեսնում բանակցությունները շարունակելու մեջ։ Ուկրաինան կարծում է, որ բանակցությունները փակուղի են մտել փետրվարին՝ Ռուսաստանի հետ բանակցությունների վերջին փուլից հետո, և հիասթափված է, որ Վաշինգտոնը չի կարողացել ճնշում գործադրել Պուտինի վրա։
Մոսկվան Ուկրաինայում հրադադարի պայման է նշում ուկրաինական զորքերի դուրսբերումը Դոնեցկի մարզից։ Ուկրաինան առաջարկում է դադարեցնել ռազմական գործողությունները առաջնագծում, որի դեպքում Ուկրաինայի Դոնբասի մեծ մասը, բայց ոչ ամբողջը, կմնա Ռուսաստանի վերահսկողության տակ։ Ուկրաինան մտադիր չէ դա իրավաբանորեն ճանաչել։
Թարգմանությունը՝ Էմմա Չոբանյանի
