03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
ԵՄ-ն նախատեսում է պատժամիջոցների նոր փաթեթում ներառել Համայն Ռուսիո պատրիարք Կիրիլին և քահանաների. Politico
Քաղաքականություն
11.05.2026 | 16:21
ԵՄ պատժամիջոցների նոր՝ 21-րդ փաթեթում նախատեսվում է ներառել սահմանափակող միջոցներ Ռուս ուղղափառ եկեղեցու ղեկավարի՝ պատրիարք Կիրիլի և եկեղեցու քահանաների նկատմամբ, հաղորդում է Politico-ն, գրում է Meduza-ն։
Նախկինում Հունգարիայի կառավարությունը՝ վարչապետ Վիկտոր Օրբանի գլխավորությամբ, որն ապրիլյան ընտրություններից հետո կորցրեց պաշտոնը, դեմ էր Ռուս ուղղափառ եկեղեցու ներկայացուցիչների նկատմամբ պատժամիջոցներին, նշում է լրատվամիջոցը։
Ըստ Politico-ի՝ քննարկվում են պատժամիջոցներն այն ընկերությունների նկատմամբ, որոնք ներկայում Ռուսաստանի կողմից վերահսկվող Ուկրաինայի տարածքներից հացահատիկի առևտուր են անում։ Նաև նախատեսվում է ընդլայնել պատժամիջոցները ռուսական նավթ տեղափոխող «ստվերային նավատորմի» նկատմամբ։ Politico-ի դիվանագիտական աղբյուրի փոխանցմամբ՝ ԵՄ-ն ցանկանում է վերսկսել քննարկումները նման նավերի սպասարկումը եվրոպական նավահանգիստներում արգելելու վերաբերյալ․ առաջարկ, որը նախկինում արգելափակվել էր Հունաստանի և Մալթայի կողմից։
Բացի այդ, աղբյուրները Politico-ին հայտնել են, որ նախատեսում են պատժամիջոցների ցանկում ավելացնել նոր ռուսական բանկեր և ռազմարդյունաբերական ձեռնարկություններ։
ԵՄ առաջնորդները, ըստ Politico-ի աղբյուրներից մեկի, կարծում են, որ հիմա ժամանակն է ընդլայնել պատժամիջոցները, քանի որ Ռուսաստանի տնտեսությունը պատերազմի սկսվելուց ի վեր ամենավատ վիճակում է, և Ռուսաստանի վրա ճնշումը պետք է ուժեղացվի։
Politico-ն նշում է, որ պատժամիջոցների 21-րդ փաթեթի շուրջ քննարկումները գտնվում են վաղ փուլում: Միևնույն ժամանակ, նշվում է, որ ԵՄ դիվանագիտության ղեկավար Կայա Կալլասը նախատեսում է մայիսի 11-ին հայտարարել նոր պատժամիջոցների մասին այն անձանց նկատմամբ, որոնք, ըստ ԵՄ-ի, ներգրավված են Ուկրաինայի օկուպացված տարածքներից երեխաների արտաքսման գործում:
Եվրամիությունն ապրիլի վերջին հաստատեց պատժամիջոցների վերջին՝ 20-րդ փաթեթը։ Սկզբնապես այն նախատեսվում էր ընդունել փետրվարին՝ Ռուսաստանի և Ուկրաինայի միջև խոշոր պատերազմի բռնկման տարելիցին, սակայն Հունգարիան դեմ էր արտահայտվել դրան՝ պահանջելով նախ վերականգնել մատակարարումները «Դրուժբա» նավթամուղով։
Թարգմանությունը՝ Էմմա Չոբանյանի
