06.09.2026 | 20:00
«Շատ մեծ ուրախություն էր, երբ իմացանք, որ խաղալու ենք «Միլանի» դեմ»․ Գևորգ Ղազարյան․ ՏԵՍԱՆՅՈւԹ
«Բոլորին դեմ եմ»-ը չի խոսում անիշխանությունից, կձևավորենք պատասխանատու իշխանություն 100 օրով․ Սպարտակ Կյուրեղյան․ ՏԵՍԱՆՅՈՒԹ
Քաղաքականություն
29.04.2026 | 19:00
«Բոլորին դեմ եմ» կուսակցությունը սկսել է ներկուսակցական ընտրությունների միջոցով վարչապետի թեկնածուի առաջադրման գործընթացը։ Իրենց առջև դրված նպատակների, հանրային ընկալումների, իշխանության գալու դեպքում անիշխանության ռիսկերի մասին մտահոգությունների և քարոզարշավի ընթացքի շուրջ Factor TV-ն հետ զրուցել է «Բոլորին դեմ եմ» կուսակցության անդամ Սպարտակ Կյուրեղյանի հետ։
Խոսելով վարչապետի թեկնածուին ներկայացվող պահանջների մասին՝ Կյուրեղյանը նշեց, որ բացի 10 անդամի առաջադրումից և 100 հազար դրամ նվիրաբերությունից, գործում է երրորդ՝ ամենակարևոր պայմանը։
«Թեկնածուն պետք է ստորագրի մեր ինքնասահմանափակող փաստաթուղթը, որը ենթադրելու է, որ հարյուրօրյա կառավարումից հետո մեր վարչապետի թեկնածուն չի մասնակցելու այդ ընտրություններին և 10 տարով ընտրովի և նշանակովի պաշտոնի չի հավակնելու»,- պարզաբանեց նա։
Կուսակցության անդամի խոսքով՝ թեկնածուի անունը հայտնի կդառնա մինչև քարոզարշավի պաշտոնական մեկնարկը՝ մոտավորապես մինչև մայիսի 3-ը։
Անդրադառնալով այն մտավախություններին, թե 100-օրյա անցումային կառավարությունը կարող է երկրում անիշխանություն ստեղծել, Սպարտակ Կյուրեղյանը վստահեցրեց. «Մենք անիշխանության մասին չենք խոսում, մենք շատ պատասխանատու իշխանություն ենք ձևավորելու, որովհետև կապ չունի՝ 100 օր ես իշխանության, թե 5 տարով, դու պետք է երկիրը կառավարես, պետք է ապահովես երկրի բնականոն ընթացքը՝ ինչպես նաև անվտանգությունը և բոլոր հարցերը»։
Նրա համոզմամբ՝ իրենց ուժի հիմնական տարբերությունը մյուս ընդդիմադիրներից ոչ թե պարզապես իշխանափոխությունն է, այլ համակարգային բարեփոխումները։
«Մեզ պետք է ձայն տան, որովհետև մեր միակ նպատակը ոչ թե եղած իշխանության հեռացումն է, այլ այնպիսի կանոնների սահմանումը, որից հետո մենք Հայաստանում հնարավորինս կքչացնենք հնարավորությունը նման իշխանությունների ձևավորման։ Այսինքն՝ մենք ոչ թե առաջարկում ենք այս մարդուն այն մարդով փոխել, այլ մենք առաջարկում ենք, բացի այդ փոփոխությունից, որը պարտադիր պետք է լինի, այսինքն՝ դա ճանապարհին հերթական քայլ է լինելու, բացի դրանից՝ համակարգային փոփոխություններ։ Ես այդ ուժերից նման առաջարկներ չեմ լսել»։
Նա նաև ընդգծեց, որ 100-օրյա ժամանակահատվածում կառավարության կազմում ընդգրկված իրենց թիմակիցները նույնպես չեն մասնակցելու հաջորդ ընտրություններին՝ այդպիսով բացառելով վարչական ռեսուրսի չարաշահումը։
Կյուրեղյանն անդրադարձավ նաև իրենց կուսակցության քարոզչական ավտոբուսի պաստառների վնասման դեպքին․ «Մեր ավտոբուսը վնասել էին, որովհետև կարծում եմ՝ ամենակրեատիվ ավտոբուսն էր։ Ես կարծում եմ, չունեմ այդպես վերջնական համոզմունք, բայց դա քաղաքապետարանի կողմից է արված եղել, որովհետև տեղում եղել են մարդիկ, ում որ մոտեցել են, հարցրել են՝ ով եք, ասել են, որ քաղաքապետարանն են ներկայացնում, ու պոկել են»։
Նա բացատրեց, թե ինչու պաշտոնական դիմում չեն ներկայացրել իրավապահներին. «Որպես իրեղեն ապացույց կարող է մեր ավտոբուսը տանեն, իսկ դա մեր համար քաղաքի ամենաթանկանոց գովազդն է։ Մենք դրա համար զուտ քաղաքական իմաստով կարող ենք բողոք հայտնել, որտեղ կարծում եմ և ինչքանով որ ճշտել եմ, սա առաջին ֆիզիկական ներգործությունն է որևէ քաղաքական ուժի գույքի վրա, այսինքն՝ որ եկել են, գույքը փչացրել են»։
Հաղորդումն ամբողջությամբ՝ տեսանյութում։
Ռոբերտ Անանյան
