Հայաստանի բռնցքամարտի ֆեդերացիան հայտարարությամբ է հանդես եկել Բրազիլում ավարտված Աշխարհի գավաթի խաղարկությունում մրցավարական անհասկանալի որոշումների վերաբերյալ։
«Հայաստանի հավաքականը Աշխարհի գավաթն ավարտեց մեկ արծաթե մեդալով։ Դավիթ Չալոյանը դարձավ փոխչեմպիոն, թեպետ Չալոյանին եզրափակիչ մենամարտում հաղթանակ պետք է շնորհվեր, սակայն հերթական անգամ մրցավարները աչքի ընկան անհասկանալի որոշումներով` 3։2 հաշվով մենամարտը նվիրելով մրցակցին։ Մրցավարական անտրամաբանական բազմաթիվ որոշումների պատճառով մեր որոշ մարզիկներ էլ զրկվեցին մեդալից։
Հայաստանի բռնցքամարտի ֆեդերացիան` Հովհաննես Հովսեփյանի գլխավորությամբ արդեն իսկ բողոք է ներկայացրել WORLD BOXING և հետամուտ է լինելու, որպեսզի մրցավարական անարդար որոշումները վերլուծվեն ու հետաքննվեն, իսկ մեղավորները պատժվեն»,- նշված է հայտարարության մեջ։
Հիշեցնենք, որ Դավիթ Չալոյանից (+90 կգ) բացի, Աշխարհի գավաթին մասնակցել էին նաև Ռուդոլֆ Գարբոյանը (50 կգ), Ժիրայր Սարգսյանը (55 կգ), Արթուր Բազեյանը (60 կգ), Արթուր Սահակյանը (65 կգ), Արարատ Հարությունյանը (70 կգ), Նարեկ Մանասյանը (90 կգ), իսկ կանանց պայքարում էին եկել Անուշ Գրիգորյանը (51 կգ) և Էլիդա Քոչարյանը (65 կգ)։
