13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
ԿԿՀ-ն ծանուցում է ուղարկել «Ուժեղ Հայաստանի» անդամներին և 30 օր ժամանակ տվել հայտարարագրման համար
Քաղաքականություն
15.04.2026 | 14:27
Կոռուպցիայի կանխարգելման հանձնաժողովը ծանուցում է ուղարկել «Ուժեղ Հայաստան» կուսակցության նախագահ Սամվել Կարապետյանին, ինչպես նաև կուսակցության խորհրդի անդամներ Նարեկ Կարապետյանին, Գոհար Մելոյանին, Ալեքսան Ալեքսանյանին և Դավիթ Ղազինյանին՝ հիշեցնելով նրանց հայտարարագիր ներկայացնելու պարտականության մասին։
Կուսակցության նախագահի և խորհրդի անդամների պաշտոնները զբաղեցնելուց հետո մեկ ամսվա ընթացքում վերջիններս արդեն պետք է հայտարարագրերը ներկայացրած լինեին, սակայն օրենքի պահանջը չի կատարվել։ Հանձնաժողովը ծանուցել է «Ուժեղ Հայաստան» կուսակցության նախագահին և խորհրդի անդամներին։ 30 օրվա ընթացքում հայտարարագիրը չներկայացնելու փաստի կապակցությամբ կուսակցության անդամները հրավիրվել են ԿԿՀ՝ վարչական իրավախախտման վերաբերյալ արձանագրություն կազմելու համար։
Տեղեկացնենք, որ հայտարարատուն հայտարարագիրը կարող է հանձնել անձամբ, կամ ներկայացուցչի միջոցով։
«Ծանուցումը ստանալուց հետո՝ 30 օրվա ընթացքում, հայտարարագիրը չներկայացնելն առաջացնում է Վարչական իրավախախտումների վերաբերյալ օրենսգրքով սահմանված վարչական տույժ (տուգանք)՝ նվազագույն աշխատավարձի երկուհարյուրապատիկի չափով (200 հազար դրամ), իսկ օրենքով սահմանված պատասխանատվության կիրառումից հետո՝ 30 օրվա ընթացքում, չներկայացնելը կարող է առաջացնել քրեական պատասխանատվություն»,-նշվում է հանձնաժողովի ծանուցման մեջ:
ԿԿՀ-ի ծանուցումը «Ուժեղ Հայաստանի» ղեկավար կազմին ուղարկվել է ապրիլի 13-ին։
Հիշեցնենք՝ ավելի վաղ Սամվել Կարապետյանի փաստաբանը դիմել է հանձնաժողով՝ հայտնելով, որ առկա է հայտարարագիր ներկայացնելու անհնարինություն՝ պայմանավորված տնային կալանքի և նամակագրության արգելքի հանգամանքով, ինչը քննարկման փուլում է։
Կարապետյանը մեղադրյալ դարձավ անցած տարվա հունիսին, երբ հայտարարեց Հայ Առաքելական եկեղեցին «իր ձևով» պաշտպանելու մասին: Սամվել Կարապետյանը 7 ամիս շարունակ կալանավայրում էր, «Երևան-Կենտրոն» քրեակատարողական հիմնարկում, հիմա՝ տնային կալանքի տակ: Իշխանությունը զավթելու հրապարակային կոչից բացի, գործարարին մեղադրում են փողերի լվացման հոդվածով:
Եվգենյա Համբարձումյան
