Էրդողանն ու Պուտինը Մերձավոր Արևելքում անհապաղ հրադադարի կոչ են անում

Վլադիմիր Պուտինը և Ռեջեփ Թայիփ Էրդողանը հեռախոսազրույցի ընթացքում քննարկել են Մերձավոր Արևելքում և Ուկրաինայի շուրջ ստեղծված իրավիճակը,  հաղորդել է Կրեմլի մամուլի ծառայությունը, գրում է Ինտերֆաքսը։ Հեռախոսազրույցը տեղի է ունեցել թուրքական կողմի նախաձեռնությամբ։

«Կայացել է մտքերի խոր փոխանակում Պարսից ծոցի տարածաշրջանում ռազմական և քաղաքական դիմակայության շարունակական սրման վերաբերյալ։ Նշվել է, որ ինտենսիվ ռազմական գործողությունները հանգեցնում են լուրջ բացասական հետևանքների ոչ միայն տարածաշրջանային, այլև գլոբալ մակարդակով, այդ թվում՝ էներգետիկայի, առևտրի և լոգիստիկայի ոլորտներում։ Առաջնորդները հաստատել են իրենց համընկնող դիրքորոշումները անհապաղ հրադադարի և տարածաշրջանի բոլոր պետությունների օրինական շահերը հաշվի առնող փոխզիջումային խաղաղության համաձայնագրերի մշակման անհրաժեշտության վերաբերյալ», – ասվում է հայտարարության մեջ։

Նշվում է, որ Ուկրաինայի շուրջ ստեղծված իրավիճակի քննարկման ժամանակ Պուտինը շնորհակալություն է հայտնել Էրդողանին՝ «համապատասխան բանակցային գործընթացը խթանելու նրա շարունակական պատրաստակամության համար»։

«Հաշվի առնելով Կիևի ռեժիմի կողմից Ռուսաստանը և Թուրքիան կապող գազատրանսպորտային ենթակառուցվածքների և Սև ծովում առևտրային նավերի վրա հարձակվելու փորձերը, ընդգծվել է Սև ծովի տարածքում անվտանգությունը համապարփակ ապահովելու համար համակարգված միջոցառումների կարևորությունը», – ասվում է հայտարարության մեջ։

Նշվում է, որ քննարկվել են նաև «ռուս-թուրքական քաղաքական, առևտրային և տնտեսական կապերի ընդլայնման հետագա քայլերը, մասնավորապես՝ էներգետիկ ոլորտում համատեղ ռազմավարական նախագծերի իրականացումը»։

Թարգմանությունը՝ Էմմա Չոբանյանի