21.04.2026 | 17:54
Եվրոպան ցանկանում է արդյունավետ կապեր Կենտրոնական Ասիայի հետ՝ Հայաստանի, Ադրբեջանի և Թուրքիայի միջոցով
Զելենսկին հայտարարել է, որ Ուկրաինայի «գործընկերները» խնդրել են չհարվածել ռուսական նավթային ոլորտին
Քաղաքականություն
30.03.2026 | 16:50
Ուկրաինայի նախագահ Վլադիմիր Զելենսկին հայտարարել է, որ Կիևի որոշ «գործընկերներ» խնդրել են նվազեցնել Ռուսաստանի նավթարդյունաբերության դեմ հարվածների քանակը համաշխարհային էներգետիկ ճգնաժամի պայմաններում, գրում է BBC-ի ռուսական ծառայությունը։
«Համաշխարհային էներգետիկ ճգնաժամից հետո մենք իսկապես ազդանշաններ ենք ստացել մեր որոշ գործընկերներից այն մասին, թե ինչպես կրճատել մեր արձագանքը նավթային ոլորտին, Ռուսաստանի Դաշնության էներգետիկ ոլորտին։ Ես ևս մեկ անգամ ընդգծում եմ. եթե Ռուսաստանը պատրաստ լինի չհարվածել ուկրաինական էներգետիկային, մենք չենք պատասխանի նրանց էներգետիկայի վրա հարձակումներով»,- ասել է Զելենսկին էներգետիկ հրադադարի հեռանկարի մասին լրագրողի հարցին ի պատասխան։
Նա նաև նշել է, որ Ուկրաինան պատրաստ է հրադադար հաստատել Զատկի շրջանում, եթե Ռուսաստանն աջակցի նման առաջարկին։
«Մենք պատրաստ ենք հրադադարի Զատկի տոների ընթացքում։ Անկեղծ ասած, նորմալ մարդիկ, ովքեր հարգում են կյանքը, խոսում են ցմահ հրադադարի մասին, այլ ոչ թե մի քանի օրվա։ Բայց մենք, անշուշտ, պատրաստ ենք ցանկացած փոխզիջման՝ բացառությամբ մեր արժանապատվության և ինքնիշխանության հետ կապված փոխզիջումների»,- ասել է Զելենսկին։
Վերջին շաբաթների ընթացքում Ուկրաինան հարվածել է ռուսական նավթի արտահանման մի քանի տերմինալների, այդ թվում՝ Լենինգրադի մարզի Ուստ-Լուգա քաղաքում։
Ուկրաինայի նախագահը վերադարձել է Մերձավոր Արևելքի շրջագայությունից, որը ներառում էր այցելություններ Սաուդյան Արաբիա, Արաբական Միացյալ Էմիրություններ, Կատար և Հորդանան։ Նա ասել է, որ իր ուղևորության ընթացքում տարածաշրջանի երկրների հետ համաձայնեցրել է ռազմական տեխնոլոգիաների ոլորտում 10-ամյա ռազմավարական գործընկերության մասին։
«Ես կարծում եմ, որ սրանք պատմական համաձայնագրեր են։ Մենք խոսում ենք տասնամյա համաձայնագրերի մասին»,- լրագրողներին ասել է Ուկրաինայի նախագահը։
Նա հավելել է, որ դրա դիմաց Ուկրաինան կարող է ստանալ հակահրթիռային պաշտպանության համակարգեր, որոնք չունի։
Զելենսկիին նաև հարցրել են Ռուսաստանի հետ խաղաղության բանակցությունների հեռանկարների մասին։ Եռակողմ խորհրդակցությունների վերջին փուլը, որին մասնակցել են ռուսական, ուկրաինական և ամերիկյան պատվիրակությունները, չեղարկվել է Իրանի հետ պատերազմի պատճառով։
«Չեմ կարծում, որ մենք փակուղում ենք։ Փակուղի, որից հետո մենք բոլորս պետք է հանձնվենք և թուլանանք։ Թող Ռուսաստանը զիջի, մենք չենք զիջի։ Մենք պետք է կազմակերպենք եռակողմ հանդիպում և շարունակենք դիվանագիտական ուղով»,- ասել է Ուկրաինայի նախագահը։
Թարգմանությունը՝ Էմմա Չոբանյանի
