Իրանի ԱԳՆ-ն կրկին հերքել է ԱՄՆ-ի հետ բանակցությունները

Իրանի Արտաքին գործերի նախարարության խոսնակ Էսմայիլ Բաղային կրկին հերքել է ԱՄՆ նախագահ Դոնալդ Թրամփի պնդումները, որ Վաշինգտոնի և Թեհրանի միջև պատերազմը դադարեցնելու վերաբերյալ բանակցություններ են ընթանում, գրում է DW-ն։

«Նախևառաջ, մենք դեռևս որևէ ուղիղ բանակցություններ չենք ունեցել։ Իրանն ԱՄՆ-ից բանակցությունների խնդրանք է ստացել երրորդ կողմերի միջոցով։ Հետաքրքիր է, թե Ամերիկայում քանի՞ մարդ է լուրջ վերաբերվում ամերիկյան դիվանագիտության պնդումներին։ Մեր խնդիրը, ի տարբերություն մյուս կողմի, որն անընդհատ փոխվում է, պարզ է։ Իրանի դիրքորոշումը պարզ է եղել սկզբից, և մենք ճշգրիտ գիտենք, թե ինչպիսին է մեր բանակցությունների շրջանակը։ Մեզ փոխանցված բովանդակությունը բաղկացած է չափազանց և իռացիոնալ պահանջներից»,- ասել է Բաղային մամուլի ասուլիսում, փոխանցում է կիսապաշտոնական Tasnim լրատվական գործակալությունը։

Նա նաև ասել է՝ լավ է, որ հարևան երկրները ձգտում են դադարեցնել պատերազմը, բայց «նրանք պետք է տեղյակ լինեն, թե որ կողմն է սկսել պատերազմը»։

«Մեր դիրքորոշումը հստակ է։ Մենք գտնվում ենք ռազմական ագրեսիայի տակ։ Հետևաբար, մեր բոլոր ջանքերն ու ուժերը կենտրոնացած են մեզ պաշտպանելու վրա»,- հավելել է Բաղային։

Ըստ նրա՝ Իրանը չի ձգտում միջուկային զենքի, սակայն չտարածման մասին պայմանագրին հետևելու հարցը քննարկվում է խորհրդարանում։

«Իրանի Իսլամական Հանրապետությունը երբեք չի ձգտել և չի ձգտում միջուկային զենքի։ Այս պայմանագրին անդամակցության վերաբերյալ, անկախ զանգվածային ոչնչացման բոլոր զենքերի արգելման վերաբերյալ մեր հստակ դիրքորոշումից, սա իսկապես հանրային կարծիքի և խորհրդարանական մակարդակով տեղի ունեցող բանավեճ է»,- ասել է  Իսմայիլ Բաղային։

Թարգմանությունը՝ Էմմա Չոբանյանի