27.06.2026 | 06:03
ԱԱ-2026. Իսպանիան հաղթեց Ուրուգվային, Կաբո Վերդեն նույնպես դուրս եկավ փլեյ-օֆֆ. ՏԵՍԱՆՅՈՒԹ
Ուկրաինական ԱԹՍ-ները գրոհել են Ռուսաստանի հարավը. Տագանրոգում 1 մարդ զոհվել է, 8-ը՝ վիրավորվել
Քաղաքականություն
30.03.2026 | 14:13
ՌԴ Ռոստովի մարզի Տագանրոգ քաղաքի վրա ուկրաինական ԱԹՍ-ների հարձակման հետևանքով զոհվել է տեղի բնակիչ, ութ մարդ վիրավորվել է, հայտնել են տեղական իշխանությունները, գրում է Current time-ը։
«Տագանրոգը ենթարկվել է զանգվածային օդային հարձակման։ Հակաօդային պաշտպանության ուժերը խոցել են բոլոր թիրախները։ Ցավոք, հետևանքները գետնի վրա են։ Այս գիշերվա գլխավոր ողբերգությունը քաղաքացիական անձի մահն է։ Մենք սգում ենք մահացածի ընտանիքի հետ»,- սոցցանցում գրել է քաղաքապետ Սվետլանա Կամբուլովան։
Անօդաչուների բեկորների անկման հետևանքով վնասել են մի քանի բնակելի շենքեր, հասարակական օբյեկտներ և արդյունաբերական ձեռնարկություններ: Ռոստովի մարզի նահանգապետ Յուրի Սլյուսարը տարածաշրջանում հայտարարել է «անօդաչու թռչող սարքերի վտանգ»: Նրա խոսքով՝ վնասվել է դպրոցի շենքը, իսկ 12 բնակելի շենք, 27 մասնավոր տուն և 10 մեքենա «մասամբ ավերվել և վնասվել են»:
Ռուսաստանի Պաշտպանության նախարարությունը հայտնել է, որ գիշերը խոցվել է ավելի քան 100 ուկրաինական անօդաչու թռչող սարք. ԱԹՍ-ներ են որսացել Բելգորոդի, Կուրսկի, Վորոնեժի, Ռոստովի, Վոլգոգրադի, Պենզայի, Ուլյանովսկի և Սամարայի մարզերի, ինչպես նաև Կրասնոդարի երկրամասի, Ազովի ծովի և բռնակցված Ղրիմի վրա:
Նախօրեին էլ Լենինգրադի մարզի Ուստ-Լուգա նավթային նավահանգիստը հարձակման էր ենթարկվել ուկրաինական անօդաչու սարքերի կողմից։ Սա մեկ շաբաթվա ընթացքում երրորդ հարձակումն էր։ Առավոտյան հրշեջները մարել են նավահանգստում բռնկված հրդեհը, հայտարարել է մարզի նահանգապետ Ալեքսանդր Դրոզդենկոն։
Ուկրաինայի անվտանգության ծառայությունը հաստատել է, որ հարվածը հասցվել է «Ալֆա» հատուկ գործողությունների կենտրոնի կողմից՝ պաշտպանության ուժերի հետ համատեղ։
Թարգմանությունը՝ Էմմա Չոբանյանի
