Պակիստանը հայտարարել է, որ «առաջիկա օրերին» կարող է հյուրընկալել ԱՄՆ-Իրան բանակցությունները

Պակիստանը հայտարարել է, որ պատրաստ է «առաջիկա օրերին» հյուրընկալել ԱՄՆ-ի ու Իրանի միջև բանակցությունները՝ երկրի մայրաքաղաքում Սաուդյան Արաբիայի, Թուրքիայի և Եգիպտոսի արտաքին գործերի նախարարների հետ հանդիպումից հետո, որը կենտրոնացած էր Մերձավոր Արևելքում լարվածության թուլացման և պատերազմի դադարեցման վրա, գրում է CNN-ը:

ԱՄՆ նախագահ Դոնալդ Թրամփի վարչակազմի պաշտոնյաներն աշխատում են Պակիստանում հանդիպում կազմակերպելու ուղղությամբ՝ Իրանում պատերազմը դադարեցնելու հարցը քննարկելու համար, անցյալ շաբաթ CNN-ին ասել էին վարչակազմի երկու բարձրաստիճան պաշտոնյաները։

«Պակիստանի համար պատիվ կլինի հյուրընկալել և նպաստել երկու կողմերի միջև բովանդակալից բանակցություններին՝ շարունակվող հակամարտության համապարփակ և երկարատև կարգավորման համար»,- Իսլամաբադում չորս երկրների միջև խորհրդակցությունների երկրորդ փուլի ավարտին արված հայտարարության մեջ ասել է Պակիստանի արտգործնախարար Իշաք Դարը։

Նա նաև հայտնել է, որ նախարարներին տեղեկացրել է Իսլամաբադում ԱՄՆ-Իրան հնարավոր բանակցությունների հեռանկարների մասին՝ հավելելով, որ Սաուդյան Արաբիայի, Թուրքիայի և Եգիպտոսի արտաքին գործերի նախարարները «լիակատար աջակցություն» են հայտնել նախաձեռնությանը։

Դարն ասել է, որ և՛ Իրանը, և՛ Միացյալ Նահանգները «լիակատար աջակցություն և վստահություն են հայտնել Իսլամաբադի ջանքերի նկատմամբ»՝ բանակցությունները խթանելու համար։ Միաժամանակ, նա հայտնել է, որ հեռախոսազրույց է ունեցել Չինաստանի արտաքին գործերի նախարար Վան Իի և ՄԱԿ-ի գլխավոր քարտուղար Անտոնիո Գուտերեշի հետ, որոնք նույնպես աջակցել են Պակիստանի նախաձեռնությունը։

Թարգմանությունը՝ Էմմա Չոբանյանի