24.04.2026 | 12:03
Ո՛չ ուրացումը, ո՛չ էլ թշնամանքը չեն կարող բուժել վերքերը. Պոլսո Հայոց պատրիարքն ուղերձ է հղել
ԱՄՆ-ն ոչնչացրել է Իրանի հրթիռների միայն մեկ երրորդը․ Reuters
Քաղաքականություն
28.03.2026 | 14:36
Միացյալ Նահանգները կարող է վստահորեն հաստատել, որ Իրանի հրթիռային զինանոցի մոտ մեկ երրորդն է ոչնչացվել ԱՄՆ-Իսրայելական պատերազմի սկսվելուց ի վեր։ Այս մասին ուրբաթ՝ մարտի 27-ին, հայտնել է Reuters-ը՝ հղում անելով ԱՄՆ հետախուզական տվյալներին ծանոթ հինգ աղբյուրների։
Reuters-ի աղբյուրներից մեկը պնդում է, որ ԱՄՆ-ի և Իսրայելի հարվածները ոչնչացրել են նաև Թեհրանի անօդաչու թռչող սարքերի մինչև մեկ երրորդը։
Միևնույն ժամանակ, հետախուզական գնահատականները ցույց են տալիս, որ Իրանը դեռևս ունի հարձակման ունակ հրթիռների զգալի պաշար, գրում է գործակալությունը։ Եվ երբ մարտական գործողություններն ավարտվեն, երկիրը կկարողանա վերականգնել վնասված և փլատակների տակ թաղված որոշ հրթիռներ։
Գործակալությունը նշում է, որ ԱՄՆ-ն չի բացահայտել հետախուզական տվյալներ այն մասին, թե քանի հրթիռ կարող էր ունենալ Իրանը պատերազմի սկզբում։ Սակայն Իսրայելի ռազմական պաշտոնյաները պնդում էին, որ Թեհրանն ուներ Իսրայել հասնելու ունակ 2500 բալիստիկ հրթիռ։
Նախօրեին ԱՄՆ նախագահ Դոնալդ Թրամփը, հրավիրված նիստի ընթացքում խոսելով Հորմուզի նեղուցի մասին, որը գործնականում փակ է մարտական գործողությունների պատճառով, հայտարարել է, որ Իրանում «շատ քիչ հրթիռներ» են մնացել, բայց դա բավարար չէ: «Մենք ասում ենք, որ ոչնչացրել ենք (նրանց հրթիռների) 99 տոկոսը: Մեկ տոկոսը անընդունելի է, քանի որ 1 տոկոսը հրթիռ է, որը հարվածում է միլիարդ դոլար արժողությամբ նավի կորպուսին», – ափսոսանքով նշել է ԱՄՆ նախագահը:
Դեմոկրատական կուսակցության անդամ և Իրաքի պատերազմի վետերան Սեթ Մուլթոնը Reuters-ին տված հարցազրույցում հերքել է Թրամփի պնդումները, որ Իրանի զինանոցը գրեթե ամբողջությամբ ոչնչացվել է: «Եթե Իրանը խելացի է, ապա պահպանել է իր որոշ հնարավորություններ՝ չի օգտագործել ողջ զինանոցը և պատրաստվում է դարանակալման», – եզրափակել է քաղաքական գործիչը:
Իսրայելական զինվորականները, սակայն, կարծում են, որ երկրի հրթիռային կայանքների մոտ 70 տոկոսը ոչնչացվել է Իրանի հետ պատերազմի ժամանակ: Այնուամենայնիվ, համակարգերի մնացած 30 տոկոսը «դժվար» կլինի ոչնչացնել:
Թարգմանությունը՝ Անահիտ Խաչատրյանի
