Օդեսայում ռուսական օդային հարվածների պատճառով վնասվել է ծննդատունը․ կա զոհ

Մարտի 28-ի գիշերը Օդեսայում ռուսական անօդաչու թռչող սարքերի հարվածների հետևանքով զոհվել է մեկ մարդ և վիրավորվել տասից ավելի մարդ, այդ թվում՝ երեխա։ Այս մասին իր Telegram ալիքում հայտնել է Օդեսայի քաղաքային ռազմական վարչության ղեկավար Սերգեյ Լիսակը։

«Պրիմորիեի շրջանում գրանցվել է ծննդատան շենքի տանիքին հարված։ Բարեբախտաբար, անձնակազմին և հիվանդներին հաջողվել է ապաստան գտնել», – գրել է Լիսակը։

Նրա խոսքով՝ անձնակազմը և հիվանդները հետագայում տարհանվել են բժշկական հաստատությունից։ Ավելի ուշ հաղորդվել է, որ հիվանդանոցում ստացած վնասվածքներից մեկ մարդ մահացել է։

Նույն տարածքում անօդաչու թռչող սարքի հարվածը մասնակի ավերածություններ է առաջացրել «բազմաբնակարան շենքի չորրորդ և հինգերորդ հարկերի միջև», իսկ պայթյունի ալիքը վնասել է այլ շենքերի պատուհանները, հայտնել է Լիսակը։ Վնասներ են գրանցվել նաև երեք ուսումնական հաստատություններում։ Անօդաչու թռչող սարքը հարվածել է նաև քաղաքի Խաջիբեյսկի շրջանում գտնվող բազմահարկ շենքի։ Հրդեհ է բռնկվել մասնավոր բնակարանում։

Ռուսական զորքերը գիշերը նաև զանգվածային անօդաչու թռչող սարքերով հարձակում են իրականացրել Կրիվոյ Ռոգ քաղաքի վրա: Հարվածվել է արդյունաբերական օբյեկտ: Ուկրաինայի իշխանությունների տվյալներով՝ երկու մարդ զոհվել է, ևս երկուսը՝ վիրավորվել:

DW-ի ռուսական ծառայությունը տեղեկացնում է, որ Ռուսաստանը նույնպես հարվածներ է ստացել անօդաչու թռչող սարքերի հարձակումից մարտի 28-ի գիշերը: Յարոսլավլի մարզի նահանգապետ Միխայիլ Եվրաևը հայտնել է, որ տարածաշրջանում ավելի քան 30 անօդաչու թռչող սարքերի հարձակումը հետ է մղվել: Վնասվել են նաև մի քանի բնակելի շենքեր և մեկ առևտրային շենք: Եվրաևը հավելել է, որ մի քանի մարդ վիրավորվել է, իսկ Յարոսլավլի ծայրամասում գտնվող մասնավոր բնակարանում մահացել է մեկ երեխա: Նա հավելել է, որ զոհերը և նրանց ընտանիքները կստանան ֆինանսական փոխհատուցում և անհրաժեշտ օգնություն:

Թարգմանությունը՝ Անահիտ Խաչատրյանի