Ադրբեջանի ընդդիմության բանտարկված առաջնորդի որդին ԱՄՆ Պետդեպում քննարկել է քաղբանտարկյալների հարցը 

Ադրբեջանի ընդդիմադիր «Ժողովրդական ճակատ» կուսակցության բանտարկված նախագահ Ալի Քերիմլիի որդին՝ Թուրքել Քերիմլին, կարևոր հանդիպումներ է ունեցել ԱՄՆ Պետքարտուղարությունում, հաղորդում են ադրբեջանական լրատվամիջոցները։

Նշվում է, որ հանդիպմանը քննարկվել են Ալի Քերիմլիի և այլ քաղբանտարկյալների գործերը, ինչպես նաև Ադրբեջանում մարդու իրավունքների և քաղաքական իրավիճակի հարցեր։

Ավելի վաղ Թուրքել Քերիմլին հանդիպել էր ամերիկացի սենատոր Փիթեր Ուելչի հետ։ Հանդիպման ժամանակ քննարկվել էր  Ալի Քերիմլիի կեղծ մեղադրանքներով ձերբակալությունը և Ադրբեջանում մարդու իրավունքների ծանր վիճակը։ Թուրքել Քերիմլին նաև սենատորին տեղեկացրել է Ադրբեջանում շարունակվող բռնաճնշումների և ընդդիմադիր Թոֆիգ Յագուբլուի վիճակի մասին։

Քննարկվել են նաև բանտարկված լրագրողների, AbzasMedia, Toplum TV, Meydan TV ընկերությունների աշխատակիցների, մարդու իրավունքների պաշտպան Անար Մամեդլիի և քաղաքացիական հասարակության ակտիվիստների դեմ հարուցված քրեական գործերը։

Ալի Քերիմլին և կուսակցության պատգամավոր Մամեդ Իբրահիմը կալանքի տակ են 2025 թվականի նոյեմբերի 29-ից: Նրանք մեղադրվում են պետության սահմանադրական կառուցվածքը բռնի կերպով փոխելուն ուղղված գործողությունների մեջ: Նրանց ձերբակալությունը կապված է Ադրբեջանի նախագահի աշխատակազմի նախկին ղեկավար Ռամիզ Մեհդիևի շուրջ անցկացված լայնածավալ հետաքննությունների հետ: Ընդդիմությունը և նրա կողմնակիցները պնդում են, որ այս ձերբակալությունը քաղաքական դրդապատճառներ ունի:

Միջազգային մարդու իրավունքների կազմակերպությունները և դիտորդներն այս ձերբակալությունները գնահատել են որպես քաղաքական բռնաճնշումների օրինակ:

Թարգմանությունը՝ Էմմա Չոբանյանի