23.08.2026 | 22:08
2 քննիչներին ծեծի ենթարկած ոստիկանը և ևս 1 մեղադրյալ կալանավորվել են․ ՔԿ
Իսպանիայում 25-ամյա աղջիկը էվթանազիայի է ենթարկվել. նա երկու տարի պայքարել է ընտանիքի դեմ՝ մահանալու իրավունքի համար
Քաղաքականություն
27.03.2026 | 23:14
Իսպանիայում 25-ամյա Նոելիա Կաստիլյո Ռամոսը ենթարկվել է էվթանազիայի, որի համար նա պայքարում էր գրեթե երկու տարի, հաղորդում է El Pais-ը։ Էվթանազիան կատարվել է կատալոնական Սանտ Պերե դե Ռիբես քաղաքի բժշկական հաստատությունում։ Աղջիկը նախկինում հայտարարել էր, որ չի ցանկանում տեսնել իր ընտանիքին և ընկերներին գործողության ընթացքում, գրում է Meduza-ն։
«Ես ասել եմ իմ ընտանիքին, որ նրանք հրավիրված են հրաժեշտ տալու, բայց ոչ այն ժամանակ, երբ ես պատրաստվում էի ներարկում ստանալ։ Ես չեմ ուզում, որ որևէ մեկը ներսում լինի, ես չեմ ուզում, որ նրանք տեսնեն, թե ինչպես եմ փակում աչքերս»,- նրա խոսքերն է մեջբերում El Pais-ը։
«Մենք աղոթում ենք նրա հոգու և նրա ընտանիքի համար։ Թող նա հանգչի խաղաղությամբ»,- գրել է ծայրահեղ կաթոլիկ «Abogados Cristianos» կազմակերպությունը սոցիալական ցանցերում։
«Abogados Cristianos»-ն աջակցել է Նոելիա Կաստիլյո Ռամոսի հորը, որը փորձել է կանխել նրա էվթանազիան։ Կազմակերպության ակտիվիստներն «աղոթքի հսկողություն» են անցկացրել բժշկական հաստատության դիմաց, որտեղ աղջիկը սպասում էր գործողությանը։
Նոելիա Կաստիլյո Ռամոսը դարձել է Իսպանիայում ամենաերիտասարդ մարդը, որը ենթարկվել է էվթանազիայի։ Այս գործողությունը երկրում օրինական է 2021 թվականից։ Նա դրա համար թույլտվություն է ստացել 2024 թվականին։
Նոելիա Կաստիլյո Ռամոսի հայրը, սակայն, ապահովել է ընթացակարգի ժամանակավոր կասեցումը։ Նա պնդում էր, որ իր դուստրն ի վիճակի չէ ինքնուրույն որոշումներ կայացնել ցավի, դեղորայքի և հոգեկան վիճակի պատճառով։ Սակայն դատարաններն ու բժշկական հանձնաժողովները, ի վերջո, եզրակացրել են, որ նա լիովին իրավասու է դա անել։
Ըստ El Pais-ի՝ Նոելիա Կաստիլյո Ռամոսը ստիպված է եղել սպասել 601 օր՝ իր կյանքին կամավոր վերջ տալու իր իրավունքն իրականացնելու համար։
Նոելիա Կաստիլյո Ռամոսի ծնողները կախվածություն են ունեցել թմրանյութերից, կորցրել են իրենց տունը և ամուսնալուծվել։ Նա 12 տարի ապրել է ապաստարաններում։ Չափահաս դառնալուց հետո նրան տեղափոխել են սոցիալական կենտրոն, որտեղ նրան խմբակային բռնաբարության են ենթարկել։ Դրանից հետո Նոելիա Կաստիլյո Ռամոսը մի քանի անգամ ինքնասպանության փորձ է արել։ Մի անգամ նա ցատկել է պատուհանից։ Աղջիկը ողջ է մնացել, բայց նրա ձեռքերն ու ոտքերը կաթվածահար էին։ Նա երկար ժամանակ տառապել է մշտական ցավերից։
Թարգմանությունը՝ Էմմա Չոբանյանի
