VK-ի դեմ պատժամիջոցները կիրառվել են, քանի որ դրա դուստր ձեռնարկությունը՝ JSC Investment Company Communications Platform-ը, մշակում է Max մեսենջերը։ Max-ի մշակումը, իր հերթին, «վերահսկվում է ԱԴԾ-ի կողմից, որը պահանջներ է սահմանում հավելվածի մշակողների համար»։

Investment Company Communications Platform հարթակը նույնպես ներառվել է նոր պատժամիջոցների ցանկում։

«Բազմաթիվ փորձագետների կարծիքով՝ Max հավելվածը հսկողության լայնածավալ հնարավորություններ ունի»,- նշում է ԵՄ-ն։

Այսպիսով, VK-ն տեխնիկական աջակցություն է ցուցաբերում «քաղաքացիական հասարակության և ժողովրդավարական ընդդիմության դեմ ուղղված ճնշումների» համար։

«ԵՄ պատժամիջոցները չեն ազդում VK-ի և MAX-ի գործունեության վրա: Հավելվածներն ու ծառայություններն օգտատերերի համար հասանելի են սովորականի պես»,- ՌԲԿ-ին հայտնել են ընկերության մամուլի ծառայությունից։

Max-ը հեռացվել էր Apple-ի App Store-ից հունիսի սկզբին, իսկ VK-ի մյուս հավելվածները, այդ թվում՝ մեսենջերը, հեռացվել են հունիսի վերջին: Apple-ը հեռացումները բացատրել էր որպես պատժամիջոցների կանոնների պահպանման արդյունք՝ առանց մանրամասնելու, թե որ պատժամիջոցների մասին է խոսքը։ Այդ ժամանակ VK-ն պատժամիջոցների տակ չէր։

Թարգմանությունը՝ Էմմա Չոբանյանի

Կոալիցիայի հիմնադիր անդամներն են Ուկրաինան, Դանիան, Ֆրանսիան, Գերմանիան, Իտալիան, Նիդեռլանդները, Նորվեգիան, Իսպանիան, Շվեդիան և Միացյալ Թագավորությունը։ Համապատասխան հայտարարությունը հնչել է Փարիզում կայացած հանդիպման ընթացքում, որտեղ մասնակցում էին նաև Ուկրաինայի նախագահ Վոլոդիմիր Զելենսկին, եվրոպական առաջնորդներ, ՆԱՏՕ-ի գլխավոր քարտուղարը և ԵՄ ղեկավարները։

Ֆրանսիայի նախագահի աշխատակազմի տվյալներով՝ նախաձեռնության նպատակն է ստեղծել Եվրոպայի համար միասնական հակաբալիստիկ պաշտպանության համակարգ, որը կհամալրի արդեն գործող և ապագայում ստեղծվելիք հակաօդային ու հակահրթիռային պաշտպանության միջոցները։ Կոալիցիան նաև նախատեսում է համատեղել եվրոպական պաշտպանական արդյունաբերության, գիտահետազոտական կենտրոնների և Ուկրաինայի ռազմական փորձը՝ նոր պաշտպանական հնարավորություններ մշակելու համար։

Reuters-ի փոխանցմամբ՝ նախաձեռնության շրջանակում նախատեսվում է զարգացնել նաև Freyja անվանումով նախագիծը, որը դիտարկվում է որպես եվրոպական հակաբալիստիկ պաշտպանության նոր համակարգ՝ լրացնելով գործող ամերիկյան Patriot և եվրոպական SAMP/T համակարգերի հնարավորությունները։

Երկուշաբթի թագավորության Ներքին գործերի նախարարությունը հայտարարել է, որ կարգելի աջակցությունը Իրանի զինված ուժերի կենտրոնական ճյուղին՝ Իսլամական հեղափոխության պահապանների կորպուսին, այս հարցի շուրջ տարիներ տևած քաղաքական պառակտումից հետո: Այս քայլը համարժեք է արգելքի, չնայած իրավական առումով նույնական չէ։

Նախատեսվում է նաև արգելել «Աջերի աջակիցների իսլամական շարժումը» (IMCR), որը մեղադրվում է Մեծ Բրիտանիայում հրեական թիրախների վրա մի շարք հարձակումների համար, և «Ռուսաստանի Դաշնության կամավորական կորպուսը» (GRU), որը Ռուսաստանի ռազմական հետախուզության միջազգային ճյուղ է:

«Բոլոր ապացույցներն ուշադիր քննարկելուց հետո, ներքին գործերի նախարարը եզրակացրել է, որ կան բավարար հիմքեր՝ ողջամտորեն կարծելու, որ այս մարմիններից յուրաքանչյուրը զբաղվում է օտարերկրյա ուժերի սպառնալիքի գործունեությամբ, և որ յուրաքանչյուրը անհրաժեշտ է Միացյալ Թագավորության անվտանգությունն ու շահերը պաշտպանելու համար»,- ասվում է հայտարարության մեջ։

Կառավարությունը հայտարարել է, որ արգելում է Իսլամական հեղափոխության պահապանների կորպուսը Մեծ Բրիտանիայի տարածքում մի շարք սպառնալիքներից, այդ թվում՝ Iran International հեռուստաընկերության երկու լրագրողների սպանության դավադրությունից, ինչպես նաև բրիտանական թիրախների վրա կիբերհարձակումներից հետո։

Այս քայլը չեղարկում է Պահպանողականների կողմից կազմակերպությունը չարգելելու նախորդ որոշումը և դրան որևէ կերպ աջակցելը կդարձնի քրեական հանցագործություն։ Այն նաև, հավանաբար, կհանգեցնի Իրանի կառավարության հետ հարաբերությունների հետագա սառեցման՝ Իրանի և ԱՄՆ-ի միջև հակամարտության ֆոնին: Պաշտոնյաները նախկինում զգուշացրել էին, որ ԻՀՊԿ-ի գործունեության արգելումը, հավանաբար, կհանգեցնի Թեհրանում Մեծ Բրիտանիայի դեսպանի արտաքսմանը:

Թարգմանությունը՝ Էմմա Չոբանյանի

Նշվում է, որ Ահմադինեժադի հավաքագրումն այնքան առաջնահերթ է եղել Իսրայելի համար, որ «Մոսադ»-ի այն ժամանակվա ղեկավար Դեյվիդ Բառնեան անձամբ հանդիպել է նրա հետ Բուդապեշտում 2024 թվականին, որից հետո իսրայելական հետախուզությունը ԿՀՎ-ին տեղեկացրել է նախկին նախագահի հետ իր կապերի մասին։ Լրատվամիջոցի աղբյուրների համաձայն՝ վերջին տարիներին Իսրայելը գաղտնի վճարել է Ահմադինեժադի կեցության և ճանապարհորդության համար, իսկ իսրայելցի գործակալները մի քանի անգամ հանդիպել են նրա հետ արտերկրում։

Լյուդովիկի պետական ​​կառավարման համալսարանում անցկացվող կոնֆերանսները ծառայել են որպես Բուդապեշտի հանդիպումների քողարկում: Համալսարանի ռեկտոր Գերգեյ Դելին NYT-ին ասել է, 2024 թվականի սկզբին հունգարացի բարձրաստիճան պաշտոնյան խնդրել է իրեն կլիմայական համաժողով կազմակերպել և հրավիրել Մահմուդ Ահմադինեժադին. միջոցառումը պարզապես քողարկում էր նրա գաղտնի բանակցություններն իսրայելական հետախուզության սպաների հետ: Դելին աել է, թե կարծում էր, որ կարող է օգնել կյանքեր փրկել:

«Դուք ունեք երկու թշնամի, և եթե այդ թշնամիները ցանկանում են խոսել միմյանց հետ, ապա լավագույնն է՝ անել հնարավոր ամեն ինչ, որպեսզի նրանք խոսեն»,- ասել է նա։

2025 թվականի հունիսին՝ Իրանի դեմ Իսրայելի պատերազմի սկսվելուց մի քանի օր առաջ, Ահմադինեժադը կրկին այցելել է Բուդապեշտ: Իսլամական հեղափոխության պահապանների կորպուսի (ԻՀՊԿ) «Անսար» ստորաբաժանման անդամներից նրա թիկնապահները հայտնել են, որ նա առնվազն երկու անգամ խուսափել է պահակախմբից և երկար ժամանակով անհետացել՝ պնդելով, որ հանդիպել է համալսարանի պրոֆեսորների հետ:

Գործողությունը գագաթնակետին է հասել 2026 թվականի փետրվարի վերջին՝ Իրանի դեմ ԱՄՆ-Իսրայել պատերազմի առաջին օրերին: Փետրվարի 28-ին Իսրայելի կողմից օդային հարված է հասցվել Ահմադինեժադի Թեհրանում գտնվող բնակելի համալիրին՝ հարվածելով նրա թիկնապահների շենքին և զրահապատ մեքենային: Դրանից հետո, ըստ հրապարակման, նախկին նախագահը, որն ապրում էր խիստ հսկողության տակ, «Մոսադ»-ի գործակալների կողմից սև «Պեժո» մակնիշի մեքենայով տարհանվել է և թաքնվել Իրանում գտնվող անվտանգ տանը: Ռեժիմը տապալելու և Ահմադինեժադին իշխանության բերելու ծրագիրը, ի վերջո, ձախողվել է։

Ըստ NYT-ի՝ նախկին նախագահը դժգոհ է եղել շտապողական գործողությունից և իրեն տարհանելուց, նաև հիասթափվել իրեն իշխանության վերադարձնելու՝ Իսրայելի ծրագրից։ Նա լքել է անվտանգ տունն անհասկանալի հանգամանքներում և հանրությանը չի ներկայացել մինչև անցյալ երկուշաբթի, երբ անսպասելիորեն մասնակցել է սպանված գերագույն առաջնորդ Ալի Խամենեիի հուղարկավորության արարողությանը։ Իրանի չորս բարձրաստիճան պաշտոնյաներ թերթին հայտնել են, որ Ահմադինեժադն այժմ տնային կալանքի տակ է՝ ԻՀՊԿ հետախուզական ծառայության հսկողության ներքո, քանի որ Իրանը տեղեկացել է Իսրայելի հետ նշանակալի կապերի մասին։

Նշվում է, որ Ահմադինեժադի ընտրությունը թվում է անսպասելի՝ հաշվի առնելով, որ 2005-ից 2013 թվականներին նախագահ լինելով՝ նա արագացրել է Իրանի միջուկային ծրագիրը, պարբերաբար կոչ է արել ոչնչացնել Իսրայելը և ժխտել Հոլոքոստը: Նշվում է նաև, թե նա մտերիմներին ասել է, որ իրեն համարում է բարեփոխիչ, ինչպես Բորիս Ելցինը, և որ եթե ինքը գա իշխանության, Իրանը կճանաչի Իսրայելը և կկարգավորի հարաբերություններն Աբրահամի համաձայնագրերի շրջանակում:

Ըստ NYT-ի՝ ռեժիմի փոփոխության ծրագիրն Իսրայելի ավելի լայն ռազմավարության մաս է, որը ներառում էր նաև Հյուսիսային Իրաքում գործող իրանական քրդական ընդդիմադիր ուժերի զինումն ու վարժեցումը, որոնք պետք է մտնեին արևմտյան Իրան և շարժվեին դեպի Թեհրան․ ծրագիր, որն այդպես էլ չիրականացավ։

Փետրվարի վերջին ԱՄՆ-ի և Իսրայելի կողմից սկսված պատերազմը շարունակվում է մինչ օրս։ Հուլիսի լույս 13-ի գիշերը և օրվա ընթացքում ԱՄՆ-ն ու Իրանը նոր հարվածներ են փոխանակել և հակասական հայտարարություններ արել Հորմուզի նեղուցի բաց լինելու մասին։ Էսկալացիան կասկածի տակ է դնում Թեհրանի միջուկային ծրագրի և պատերազմի ավարտի շուրջ բանակցությունները։

Թարգմանությունը՝ Էմմա Չոբանյանի

Նա նշել է, որ դա ընդգրկում է քաղաքական, տնտեսական, տրանսպորտային և բոլոր մյուս ոլորտները։ Ներկայում Ադրբեջանում գործում են ավելի ու ավելի շատ չինական ընկերություններ։ Դրանցից մի քանիսն արդեն իրականացնում են խոշոր ներդրումային նախագծեր, իսկ մյուսները մասնակցում են տարբեր ենթակառուցվածքային նախագծերի։ Նա նաև հավելել է, որ Ադրբեջանն արդեն որոշակի նպատակների համար նախատեսված ռազմական արտադրանք է գնել Չինաստանից։

«Ադրբեջանն արդեն ձեռք է բերել որոշակի ռազմական նշանակության արտադրանք, որոնցից մի քանիսը ցուցադրվել են մեր Հաղթանակի հինգերորդ տարեդարձին նվիրված զորահանդեսում»,- ընդգծել է նա։

Ալիևի խոսքով՝ Ադրբեջանը քննարկում է Չինաստանի հետ համագործակցությունը պաշտպանական և ռազմատեխնիկական ոլորտներում։ Նա նաև նշել է, որ մատակարարումների մի մասն արդեն տարանցման մեջ է, մնացած հարցերի շուրջ բանակցություններ են ընթանում։

Բացի այդ, Ալիևը հայտարարել է, որ պաշտպանական արդյունաբերությունը նաև Ադրբեջանի և Ճապոնիայի միջև համագործակցության հեռանկարային ոլորտ է, երկրները կարող են ապագայում համատեղ ձեռնարկություններ հիմնել։

«Ճապոնիան զարգացնում է իր պաշտպանական արդյունաբերությունը։ Մենք նույնպես աշխատում ենք այս ուղղությամբ։ Մենք կարող ենք փորձ փոխանակել այս ոլորտում և նույնիսկ ապագայում համատեղ արտադրական նախագծեր իրականացնել»,- ասել է նա։

Թարգմանությունը՝ Էմմա Չոբանյանի

Ֆրանսիան էլեկտրաէներգիայի շուրջ 70 տոկոսն արտադրում է ատոմային էլեկտրակայաններում, որոնց մի մասը սառեցման համար օգտագործում է գետերի ջուրը։ Բնապահպանական նորմերի համաձայն՝ եթե գետերի ջերմաստիճանը չափազանց բարձր է, կայանները պետք է նվազեցնեն արտադրությունը կամ ժամանակավորապես դադարեցնեն աշխատանքը, որպեսզի շրջակա միջավայր վերադարձվող ջուրը չվնասի գետերի էկոհամակարգերին։

 Նշվում է, որ հուլիսի 13-ի դրությամբ Ֆրանսիայի ութ ռեակտորներում ընդհանուր առմամբ շուրջ 6,3 գիգավատ արտադրական հզորություն սահմանափակվել էր, իսկ շոգի պահպանման դեպքում հնարավոր էին նաև լրացուցիչ սահմանափակումներ։

 Հաղորդվւմ է նաև, որ այս միջոցառումները կապված չեն ատոմակայանների անվտանգության հետ․ ռեակտորները կարող են անվտանգ աշխատել նաև բարձր ջերմաստիճանների պայմաններում, սակայն արտադրության կրճատումը պահանջվում է շրջակա միջավայրի պահպանության կանոնների պահպանման նպատակով։

«Ինչ-որ արվում է կամ ինչ-որ ներկայացվում է որպես քրեաօլիգարխիայի ապամոնտաժում, լավագույն սցենարի դեպքում արվում է կեսից։ Եթե չունես դատաիրավական արդար, արդյունավետ աշխատող մեխանիզմ, և ձեռնարկում ես նման գործողություններ, դրանք կարող են արդյունավետ լինել, կարող են անարդյունավետ լինել, բայց անարդար լինելու կասկածի հետքը շարունակ մնալու է հանրության շրջանում»,- նշեց Բարսեղյանը։

Նա ընդգծեց, որ իշխանությունը նախընտրել է կետային միջամտությունները՝ համակարգային լուծումների փոխարեն։ «Ես կնախընտրեի, որ ութ տարի առաջ պարոն Փաշինյանը սկսեր իր խոստումն իրականացնել՝ դատաիրավական համակարգը բարեփոխեր, և այդ համակարգը կարողանար արդյունավետ, արդարադատություն իրականացնել իր բոլոր օղակներով՝ ոստիկանություն, դատախազություն, քննչական մարմիններ և իհարկե՝ դատարաններ»։

Անդրադառնալով Գագիկ Ծառուկյանի դեմ հարուցված քրեական գործին՝ Բարսեղյանը այսպիսի կարծիք հայտնեց ներկայացված մեղադրանքների և դրանց քաղաքական ենթատեքստի առնչությամբ։ «Դժվար եմ պատկերացնում, որ այդքան հարստություն ունեցող մարդը 21 միլիոն դոլարի կողոպտելու բանի գնա։ Գաղափար չունեմ, կարող է՝ դա էլ կա, չեմ կարող ասել»։

Նրա կարծիքով, իշխանությունը, թիրախավորելով առանձին գործիչների, անտեսում է ավելի խորքային և համակարգային հանցագործությունները։ «Ինչու՞ Քոչարյանի 200 միլիարդ դոլար գնահատվող, ապօրինի համարվող գույքի վերադարձի առաջխաղացում չկա։ Մարտի 1-ի գործի ձգձգումները մինչև ո՞ւր կարող են շարունակվել, մինչև վաղեմության բոլոր հնարավոր ժամկետները անհաղթահարելի դառնան»։

Բարսեղյանի դիտարկմամբ՝ իշխանության այս մոտեցումը բխում է նախկին իշխանավորների «ռևանշի ռիսկը» թերագնահատելուց․ «Ինձ թվում է, որ Փաշինյանը թերագնահատել էր նախկին իշխանավորների ռևանշի ռիսկը։ Իրեն թվում էր, չգիտեմ ինչու էր թվում… որ եթե ինքը համբերատար կամ ներողամտորեն է վերաբերվում, խաթրաշահ է, սիրալիր, բարության դիրքերից է հանդես գալիս, բոլորն ասելու են՝ «Վա՜յ, ապրի արևդ, այս ինչ լուսավոր առաջնորդ է, այսքան վատ-վատ բաներ ենք արել, բերեք այլևս չանենք»։

Բանախոսը նաև մատնանշեց իշխանության հակասական դիրքորոշումը խորհրդարան անցած ընդդիմության նկատմամբ։ Մի կողմից, ըստ Փաշինյանի, ընդդիմության օգտին տրված բոլոր քվեներն ընտրակաշառքի արդյունք են, մյուս կողմից՝ իշխանությունը հաշտ է նրանց հետ նույն խորհրդարանում գտնվելու փաստի հետ։

«Իշխանությունը, փաստորեն, հաշտ է խորհրդարանում իր պնդմամբ իշխանության զավթման փորձ արած քաղաքական ուժի կամ ուժերի ներկայության հետ։ Փաստացի այդպես է։ Քաղաքացիական պայմանագիրը չի դիմել Սահմանադրական դատարան՝ ընտրությունների արդյունքները անվավեր հայտարարելու և վերաքվեարկություն նշանակելու պահանջով։ Միևնույն ժամանակ, Փաշինյանն ասում է, որ նրանց օգտին, ով քվե է տվել, բոլորը՝ 100 տոկոսով, ընտրակաշառքով են տվել։ Բա ինչու՞ եք հաշտ, որ 41 հոգի պիտի ընտրակաշառքով զբաղեցնի պատգամավորական տեղեր։ Սա անարդար է»,- ասաց նա։

Ամփոփելով՝ Բարսեղյանը կրկին շեշտեց, որ առանց դատավորների զտման (վեթինգի) և արդարադատության համակարգի իրական բարեփոխման, որը խոստացվել էր դեռ ութ տարի առաջ, «քրեաօլիգարխիայի» դեմ պայքարը մնալու է կիսատ և անարդյունավետ։

Հարցազրույցն ամբողջությամբ՝ տեսանյութում։

Ռոբերտ Անանյան

Ռուսաստան-Բելառուսում ապաստանած Ծառուկյանի որդուն Հայաստան վերադարձնելու վերաբերյալ վարչապետի խոսույթը խիստ մտահոգիչ գնահատելով հանդերձ՝ իրավապաշտպաններն ընդգծում են՝ իսկ որքանո՞վ Փաշինյանին կհաջողվի Նվեր Ծառուկյանին Հայաստան վերադարձնել։

«Ձեռքերը չի հասնում արտասահմանից ՀՀ վերադարձնել նրանց, որոնք մեղադրվում են տարբեր հանցագարծություններում։  Խոստանալ բաներ, որոնք չես կարող անել, վայել չէ, սխալ է, ձախողման նշան է»,- ասում է Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը։

Երկու տարի առաջ Հայաստանը լքած Նվեր Ծառուկյանին վերադարձնելու հայտարարության ֆոնին հիշարժան են դառնում Փաշինյանի այլ խոստումներ աշխարհի տարբեր երկրներից մեղավորների վերադարձնելու վերաբերյալ։

«Ոչ մի մուկ, ոչ մի ձուկ չի պլստալու։ Հայաստանում գողերի ժամանակն անցել է, ամերիկաներից լինի, ավստրալիաներից լինի, ռուսաստաններից լինի՝ գտնելու ենք, բերենք գողացած ամեն լումա»,- 2018-ին հեղափոխական հարթակներից հայտարարում էր Նիկոլ Փաշինյանը։

Հեղափոխական Փաշինյանի այս ելույթից հետո ոչ միայն Հայաստանում հարստացած և հեռացածներին վերադարձնել չհաջողվեց, այլ նաև տարբեր քրեական գործերով անցնող նախկին բարձրաստիճան պաշտոնյաներ լքեցին երկիրը նրա վարչապետության օրոք։

Նիկոլ Փաշինյանի կառավարման տարիներին Հայաստանը լքելու միջոցով արդարադատությունից խուսափել են նախկին գլխավոր դատախազ Գևորգ Կոստոնյանը, ԴԱՀԿ նախկին պետ Միհրան Պողոսյանը, բնապահպանության նախկին նախարար Արամ Հարությունյանը, Սյունիքի նախկին մարզպետ Սուրիկ Խաչատրյանը, Հոկտեմբերի 27-ի գործը քննած դատավոր Սամվել Ուզունյանը, Մարտի 1-ի գործով քննչական խմբի նախկին ղեկավար Վահագն Հարությունյանը, Սերժ Սարգսյանի եղբայր Լևոն Սարգսյանը, նրա խնամին՝ Արա Մինասյանը, ՊԵԿ նախկին նախագահ Գագիկ Խաչատրյանի որդին՝ Գուրգեն Խաչատրյանը։ Մեկ ամիս առաջ պարզվեց, որ Խաչատրյանի մյուս որդին՝ Արտյոմ Խաչատրյանը նույնպես երկրում չէ և հետախուզվում է։ Այս իշխանություններին Հայաստան վերադարձնել չի հաջողվել նաև Վատիկանում ՀՀ նախկին դեսպան Միքայել Մինասյանին ու պաշտպանության նախկին նախարար Միքայել Հարությունյանին։

Նիկոլ Փաշինյանը նախընտրական քարոզարշավի շրջանակում կոշտ բառապաշար կիրառելով ոչ միայն Ծառուկյանին էր սպառնում, այլ նաև Ռոբերտ Քոչարյանին, Սամվել Կարապետյանին և այլ ընդդիմադիրների։ Ընտրություններից կարճ ժամանակ անց դիմակավորված ԱԱԾ-ականները ներխուժեցին Ծառուկյանի առանձնատուն։

ԲՀԿ ղեկավարին փողերի լվացման մեղադրանք առաջադրվեց՝ իրանցի գործարարների հետ համատեղ բիզնեսին վերաբերող քրեական վարույթի շրջանակում։ Այս ամենը հաջորդում է Փաշինյան-Ծառուկյան սուր լեզվակռվին։ Արդյո՞ք Փաշինյանն այսպիսով վրեժ է լուծում Ծառուկյանից՝ իրեն արու առյուծի վանդակ մտնելու առաջարկի համար, թե՞ որոշել է թալանվածը վերադարձնելու համակարգային գործընթաց սկսել։

«Պետք է հուսանք, որ համակարգային գործընթաց է սկսվում, որովհետև վարչապետի մակարդակով շատ կոշտ է արտահայտվում դատական իշխանության մասին, սա հուսադրող է»,- կարծում է «Ազատ քաղաքացի» ՀԿ ղեկավար Հովսեփ Խուրշուդյանը։

Նիկոլ Փաշինյանը Դատախազության օրն էր գլխավոր դատախազ Աննա Վարդապետյանին, ԱԱԾ տնօրեն Անդրանիկ Սիմոնյանին, քննչական մարմինների ղեկավարներին նկատողություն արել, թե Հայաստանում հակակոռուպցիոն քաղաքականությունը լճացած է։

«Նախընտրական քարոզարշավի ընթացքում ինձ համար դժվարությունը ծագել է այնտեղ, երբ ստիպված եմ եղել պատասխանել հարցերի արդարադատության բացակայության վերաբերյալ»,- ասել էր վարչապետը։

Քաղհասարակության ներկայացուցիչները մատնանշում են այն բացթողումներն ու չկատարված աշխատանքները, որ Փաշինյանը խոստացել էր արդարադատության ոլորտում, բայց չի իրականացրել։

«Իրավապահ համակարգի բոլոր օղակները պետք է արմատապես մաքրազտման ենթարկեն, ինչը չեն, արել։ Խոստացել էր դատավորներին վեթինգի ենթարկել, հետո խոստովանեց, որ չի արել»,- ասաց Լևոն Բարսեղյանը։

«Վեթինգի ինստիտուտը չի իրականացվել, որը խոստացվել էր։ Սա ՔՊ-ում գտնվող անձանց և դատական համակարգում գտնվողների սերտ կապերի հետևանք է»,- նշեց Հովսեփ Խուրշուդյանը։

Նիկոլ Փաշինյանի իշխանության օրոք այդպես էլ որևէ ազդեցիկ պաշտոն զբաղեցրած նախկին պաշտոնյա ճաղերի հետևում չհայտնեց։ Ընդհակառակը, տարբեր մեղադրանքերով արդարացվել են Ռոբերտ Քոչարյանը, Գագիկ Ծառուկյանը, Վլադիմիր Գասպարյանը, Լևոն Երանոսյանը։

Մանրամասները՝ տեսանյութում։

Նարեկ Կիրակոսյան

Եկեղեցում պատարագ է մատուցել Հայր Հարություն Դամատյանը։

Թուրքական լրատվամիջոցներն ընդգծում են, որ Վարդավառը, որը ծագում է հայերեն «վարդ» և «վառ» բառերից, հայտնի է նաև որպես «Ջրի տոն»։

Մոտ 5000 տարվա պատմություն ունեցող Վարդավառի ծագումը, ըստ կարծիքների, ընկած է Նոյի շրջանի ջրհեղեղի պատմության մեջ։ Միմյանց ջրով ցողելու ավանդույթը խորհրդանշում է կյանքի նորացումը ջրհեղեղից հետո տեղացող առատ անձրևով։

Թարգմանությունը՝ Էմմա Չոբանյանի

«Հուլիսի 13-ին ՀՀ արտաքին գործերի նախարարությունը, Հայաստանում ԵՄ նոր գործընկերության առաքելության հետ համատեղ, կազմակերպել էր կլոր-սեղան քննարկում, որը հյուրընկալել էին ՀՀ արտաքին գործերի նախարարի տեղակալ Վահան Կոստանյանը և ԵՄ արտաքին գործողությունների ծառայության քաղաքացիական գործողությունների հրամանատար և կառավարող տնօրեն Ստեֆանո Տոմատը՝ ԵՄ պատվիրակության ղեկավար Վասիլիս Մարագոսի և Հայաստանում ԵՄ գործընկերության առաքելության ղեկավար Կոսմին Դինեսկուի հետ միասին։ Համատեղ միջոցառումը համընկնում էր Հայաստանում ԵՄ գործընկերության առաքելության մեկնարկի վերաբերյալ ԵՄ խորհրդի որոշման ընդունման հետ։

Հայաստանում ԵՄ գործընկերության առաքելության մեկնարկը նոր ու կարևոր էջ է բացում Հայաստանի և Եվրոպական միության միջև գործընկերությունում։ Այս առաքելության միջոցով ԵՄ-ն վերահաստատում է իր հանձնառությունը՝ շարունակաբար զարգացող մարտահրավերների պայմաններում աջակցելու Հայաստանի դիմակայունությանը և ինստիտուցիոնալ կարողություններին։

Ռազմավարական խորհրդատվության, տեխնիկական փորձագիտության և ինստիտուցիոնալ կարողությունների զարգացման միջոցով Առաքելությունը սերտորեն համագործակցելու է Հայաստանի հաստատությունների հետ՝ քաղաքականության շրջանակներն ամրապնդելու, մանդատի շրջանակներում Կառավարության կարողությունները բարելավելու և միջգերատեսչական համակարգմանն աջակցելու համար։

Միջոցառումը մասնակցում էին քաղհասարակության, ակադեմիական շրջանակների ներկայացուցիչներ և փորձագետներ, ում ներկայացվել է Հայաստանում ԵՄ գործընկերության առաքելությունը` որպես Հայաստանի դիմակայունության ամրապնդմանն աջակցող գործընկեր:  Տեղի է ունեցել նաև մտքերի փոխանակում զարգացող սպառնալիքների, մասնավորապես՝ կիբերսպառնալիքների, օտարերկրյա տեղեկատվական մանիպուլյացիաների ու միջամտության, ինչպես նաև ապօրինի ֆինանսական հոսքերի դեմ Հայաստանի դիմակայունության ամրապնդման շուրջ»,- ասված է հաղրդագրությունում։

Նախապատմություն

Հայաստանում ԵՄ գործընկերության առաքելությունը ԵՄ անվտանգության և պաշտպանության ընդհանուր քաղաքականության քաղաքացիական խորհրդատվական առաքելություն է։ Առաքելությունը հիմնվել է ընթացիկ տարվա ապրիլի 21-ին և մեկնարկել հուլիսի 13-ին։

Հայաստանում ԵՄ գործընկերության առաքելությունը հիմնվել է ՀՀ կառավարության համապատասխան դիմումի հիման վրա: Առաքելությունը ԵՄ ավելի լայն և համապարփակ մոտեցման մաս է կազմում, որը համատեղում է Հայաստանի դիմակայունության ապրապնդմանը միտված կարճաժամկետ և երկարաժամկետ աջակցություն:

Առաքելությունը չունի գործադիր մանդատ։ Այն որևէ դերակատարում չունի ՀՀ իշխանությունների որոշումների կայացման գործընթացներում։