03.08.2026 | 22:59
Էրդողանի դաշնակից Բահչելին ու Օջալանն աջակցություն են հայտնել Թուրքիա-PKK խաղաղության գործընթացին
Պապիկյանը ԿԿՀ է ներկայացրել Իրանի ՊՆ զոհված նախարարից ստացած նվերը
Հասարակություն
17.03.2026 | 11:53
Պաշտպանության նախարար Սուրեն Պապիկյանը նվեր է ստացել Իրանի պաշտպանության և ԶՈՒ աջակցման նախկին նախարար Ազիզ Նասիրզադեից։ Այս մասին Factor.am-ը տեղեկանում է Պապիկյանի՝ Կոռուպցիայի կանխարգելման հանձնաժողով ներկայացրած պաշտոնյայի նվերների հաշվառման ձևաթղթից։
Նասիրզադեն Պապիկյանին նվիրել է պղնձից պատրաստված «ծաղկամանի և քաղցրավենիքի ամանի» հավաքածու՝ ձեռքով մշակված մանրապատկերով, պարսկական նախշերով կտորից և կաշվի փոխարինիչից պատրաստված տուփով։ Նվերի արժեքը գնահատվել է 122 804 դրամ։
Պապիկյանը նվերը ստացել է փետրվարի 26-ին Թեհրան կատարած պաշտոնական այցի ընթացքում։
Հիշեցնենք, որ այցից երկու օր անց Իսրայելը և Միացյալ Նահանգները հարվածներ հասցրին Իրանին, որի հետևանքով զոհվեցին գերագույն առաջնորդ Ալի Խամենեին և մի շարք այլ բարձրաստիճան պաշտոնյաներ, այդ թվում՝ Նասիրզադեն։
Հավելենք, որ «Հանրային ծառայության մասին» օրենքը սահմանում է հանրային ծառայողների կողմից նվերներ ընդունելու վերաբերյալ կանոններ։
Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:
Անի Թամրազյան
