Հարկային տեռո՞ր եք անելու, թե՞ Սամվել Կարապետյանի ունեցվածքն եք դնելու բյուջեում՝ ծախսեք. Արսեն Թորոսյան․ ՏԵՍԱՆՅՈՒԹ

Աշխատանքի և սոցիալական հարցերի նախարար, «Քաղաքացիական պայմանագիր» կուսակցության վարչության անդամ Արսեն Թորոսյանը Factor TV-ի հետ զրույցում անդրադարձել է ընտրություններից ամիսներ առաջ կառավարության կողմից իրականացվող սոցիալական ծրագրերին, դրանց շուրջ ընդդիմության քննադատություններին և երկրում առկա քաղաքական մրցակցությանը։

Անդրադառնալով դիտարկմանը, թե իշխանությունը նախընտրական շրջանում տեղեկատվական դաշտը լցնում է պոզիտիվ լուրերով, ինչպիսիք են կենսաթոշակների բարձրացումը կամ առողջության ապահովագրությունը, Թորոսյանը հակադարձեց՝ նշելով, որ դրանք երկարաժամկետ բարեփոխումների արդյունք են, ոչ թե իրավիճակային քայլեր։ «Կարճ հիշողություն ունեցող մարդկանց համար երևի կլինի հենց հիմա, իսկ ավելի երկար հիշողություն ունեցող մարդկանց համար կլինի վերջին ութ տարին։ Եվ մենք ոչ մի լուրերով, այսպես, տպավորություն ստեղծելու միտում չունենք։ Մենք անում ենք փոփոխություններ երկրում և բարեփոխումներ, որոնք նաև կարող են լուսաբանվել, բայց ամբողջ իմաստը լուսաբանումը չէ, այլ մարդկանց կյանքում իրական փոփոխություն բերելը», – ասաց նա՝ հավելելով, որ կենսաթոշակները վերջին ութ տարում բարձրացվել են յոթ անգամ։

Նրա խոսքով՝ իշխանության խնդիրը հենց դրական փոփոխություններ իրականացնելն է՝ ի տարբերություն ընդդիմության, որը, ըստ նրա, միայն բացասականն է կանխատեսում։  Ի պատասխան հարցին, թե ինչու 2021 թվականի խոստումները, օրինակ՝ գործազրկության ցուցանիշը նվազեցնել 10%-ից, լիովին չեն իրականացվել, Թորոսյանը մատնանշեց մի շարք արտաքին և ներքին ճգնաժամեր, որոնք խոչընդոտել են ծրագրերի ամբողջական կատարմանը։ «Ի՞նչ ճգնաժամերի միջով է անցել Հայաստանի Հանրապետությունը 21 թվականից մինչև 26 թվականը, որոնք բերել են, այդ թվում, տնտեսական մեծ, չնախատեսված ծախսերի։ Ոչ ոք չի հիշում դրա մասին, ոչ ոք չի հիշում, որ հարյուրավոր միլիարդներ ենք ծախսել և ծախսում, օրինակ, Ղարաբաղի մեր հայրենակիցների վրա, հենց հիմա՝ բնակապահովման վրա, ամենաամսյա վճարումների վրա», – նշեց նախարարը։ Նա հավելեց նաև, որ անվտանգային մարտահրավերների պատճառով պետությունը ստիպված է եղել մեծածավալ ներդրումներ անել սպառազինության և սահմանների ամրաշինական աշխատանքների ուղղությամբ։

Խոսելով քաղաքական դաշտում օլիգարխիկ ուժերի հնարավոր վերադարձի և համախմբման մասին՝ Թորոսյանը նշեց։ «Մենք կարծում ենք, որ օլիգարխիկ կառավարման և ֆեոդալական կառավարման տարիներն անցյալում են, շուտով կլինեն աստիճանաբար, կլինեն շատ նաև հեռավոր անցյալում, հա՞, և մեր ժողովուրդը երբեք չի ցանկանալու վերադառնալ այդ ֆեոդալական կարգերին՝ ձեր նշած և չնշած անձանց գլխավորությամբ»։

Նա առաջ քաշեց «զրո ձայն օլիգարխներին» սկզբունքը՝ ընդգծելով, որ օլիգարխների շահերը հակադիր են ժողովրդի շահերին։ Ի պատասխան դիտարկմանը, թե իշխանությունն է թույլ տվել այդ ուժերի մուտքը քաղաքականություն, նա ասաց. «Ի՞նչ է նշանակում՝ մենք ենք թույլ տվել։ Կա օրենք, կուսակցություն, գրանցում, մասնակցություն։ Եթե դուք կարծում եք, որ մենք պիտի ընտրությունները կեղծենք հօգուտ այլոց… մենք դա չենք պատրաստվում անել»։

Հարցազրույցն ամբողջությամբ՝ տեսանյութում։

Ռոբերտ Անանյան