14.09.2026 | 21:30
10 օր առանց ռուսական գազի․ ինչու պլանային անջատումն այս անգամ քաղաքականացվեց
«Մարտի 1»-ի գործով մեղադրանք է առաջադրվել Վալերիյ Օսիպյանին և նրա նախկին ղեկավարին
Հասարակություն
12.02.2026 | 21:38
«Մարտի 1»-ի քրեական վարույթի շրջանակներում քրեական հետապնդումներ են հարուցվել ևս երկու նախկին պաշտոնատար անձանց նկատմամբ։ Այս մասին FactorTV-ի հարցմանն ի պատասխան հայտնեցին Հակակոռուպցիոն կոմիտեից։
«Մասնավորապես՝ 2008 թվականի մարտի 1-ին ոստիկանության տարբեր ստորաբաժանումների կողմից բռնության և հատուկ միջոցների գործադրմամբ Երևան քաղաքի «Ազատության» հրապարակում նստացույց անող խաղաղ ցուցարարներին ցրելու գործողությունները կազմակերպելու համար մեղադրանքներ են ներկայացվել նշված ժամանակահատվածում ՀՀ ոստիկանության Երևան քաղաքի վարչության պարեկապահակակետային գնդի հրամանատարի և նրա տեղակալի պաշտոնները զբաղեցրած անձանց»,- նշեց կոմիտեի խոսնակ Մարինա Օհանջանյանը՝ առանց մանրամասնելու նախկին պաշտոնյաների անունները։
Նշենք, որ Օսիպյանի ձերբակալման մասին ավելի վաղ գրել էր «Արմլուր» լրատվականը։ FactorTV-ի տեղեկություններով՝ Մարտի 1-ին Երևան քաղաքի վարչության պարեկապահակակետային գնդի հրամանատարը Ռոբերտ Մելքոնյանն է եղել, նրա տեղակալը՝ Վալերիյ Օսիպյանը։
Հիշեցնենք՝ հեղափոխությունից հետո վարչապետ ընտրվելուց երկու օր անց, Նիկոլ Փաշինյանի առաջարկությամբ և Հայաստանի նախագահ Արմեն Սարգսյանի հրամանագրով Վալերիյ Օսիպյանը նշանակվել էր ՀՀ ոստիկանապետ։ Ավելի քան մեկ տարի անց՝ 2019 թվականի սեպտեմբերի 18-ին, Օսիպյանն ազատվել էր ոստիկանապետի պաշտոնից և նույն օրը երեկոյան նշանակվել Հայաստանի վարչապետի գլխավոր խորհրդական։ Այս պաշտոնին, սակայն, Օսիպյանը չմնաց անգամ մեկ ամիս. հոկտեմբերի 8-ին նա ազատվեց։
Ռոզա Վարդանյան
