«Վաղը ելույթներ կունենանք»․ ընդդիմադիր պատգամավորը՝ այսօր Փաշինյանի հետ հարցուպատասխանին չմասնակցելու մասին

ԱԺ կանոնակարգի համաձայն՝ այսօր տեղի ունեցավ ՀՀ կառավարության անդամների և ԱԺ պատգամավորների հարցուպատասխանը։ Խորհրդարանական ընդդիմադիր խմբակցությունները չէին մասնակցում։ Եթե «Պատիվ ունեմ»-ը մշտապես ներկա չի լինում, ապա «Հայաստան»-ը մեծամասամբ մասնակցում է։ Factor.am-ն այսօր պատգամավոր Քրիստինե Վարդանյանից հետաքրքրվեց՝ ինչո՞ւ խմբակցությունը չէր մասնակցում նիստին և Նիկոլ Փաշինյանին հարցեր ուղղում Վենսի այցի, ձեռքբերված այն պայմանավորվածությունների վերաբերյալ, որոնք քննադատում են։

«Հարցուպատասխանից առաջ ԱԺ օրակարգում մեր խմբակցության բերած նախագիծն էր քննարկվում, որն ընդմիջվեց հարցուպատասխանով, վաղը սպասվում են 10 րոպեանոց ելույթները, այդ ֆորմատում մենք հնարավորություն ենք ունենալու առանց սահմնափակման և հիմնավոր ներկայացնել մեր տեսակետները»,-ասաց Քրիստեինե Վարդանյանը։

Հարցին՝ արդյո՞ք պետք չէր Փաշինյանին ուղիղ հարցեր ուղղել, պատգամավորն ասաց.

«Իսկ որ Նիկոլ Փաշինյանը լինում է, ի՞նչ է լինում, խոսում է անսահմանափակ, մեր ժամանակը մշտապես սահմանափակվում է, բայց, քանի որ հիմա հնարավորություն կա՝ հավասար պայմաններում կասենք մեր ասելիքը։ Մենք ընտրում ենք մեզ համար հարմար պայմանները»։

Իշխանականները նիստի ընթացքում հայտարարեցին, թե ընդդիմադիրները չկան, որովհետև ասելիք չունեն, Հայաստանի համար շահավետ պայմանավորվածություններ են։ Այս առնչությամբ Քրիստինե Վարդանյանը նշեց․ «Եթե իրենց հետաքրքրում է՝ ինչ ենք ասելու, կարող են լսել մեր այս օրերի հայտարարությունները։ Եթե անհամբեր սպասում են մեր ասելիքին, կարող են վաղվա ելույթները լսել»։

Նարեկ Կիրակոսյան