Քոչարյանը սպառնալիք է դիտարկում Թրամփի ուղին. ո՞նց է ՌԴ-ին բերում՝ կպցնում․ որ ընդհանրապես չլինի՞ այդ ծրագիրը․ Արման Եղոյան. ՏԵՍԱՆՅՈՒԹ

Ազգային ժողովի «Քաղաքացիական պայմանագիր» խմբակցության պատգամավոր Արման Եղոյանի խոսքով, թեև այս պահին Եվրասիական տնտեսական միությունից (ԵՏՄ) դուրս գալու հարց օրակարգում չկա, սակայն Եվրամիությանն անդամակցության ճանապարհին կգա մի փուլ, երբ Հայաստանը պետք է ընտրություն կատարի երկու կառույցների միջև։ Factor TV-ին տված հարցազրույցում նա անդրադարձել է ԱԺ նախագահ Ալեն Սիմոնյանի և ՌԴ ԱԳ նախարար Սերգեյ Լավրովի հանդիպմանը, ռուսական ճնշումներին և ԱՄՆ-ի հետ զարգացող հարաբերություններին։

Մեկնաբանելով Ալեն Սիմոնյանի հայտարարությունը, թե Հայաստանը չի պատրաստվում լքել ԵՏՄ-ն, և դա հակասում է ԵՄ-ին անդամակցելու գործընթաց սկսելու մասին օրենքի ընդունմանը, Արման Եղոյանը նշել է, որ խոսքը ներկա պահի մասին է։  

Նրա խոսքով՝ Եվրամիությանն անդամակցելու գործընթացում կա մի փուլ՝ ազատ առևտրի գոտուն միանալը, որն անհամատեղելի է այլ մաքսային միության անդամակցության հետ։ «Այն փուլում, երբ հարց ծագեց ազատ առևտրի գոտուն միանալու մասին, (…) այդտեղ բնականաբար պետք է որևէ այլ մաքսային միության մեջ չլինելու հարցը ծագի։ […] Դա ոչ թե ինչ-որ մեկի ցանկություն կամ կամք է, դա տեխնիկական պայման է», – ընդգծել է նա՝ հերքելով Լավրովի այն պնդումը, թե ԵՄ-ն է Հայաստանին կոշտ ընտրության առաջ դնում։

Անդրադառնալով «Խաղաղության խաչմերուկ» նախագծին և դրանում Ռուսաստանի հնարավոր մասնակցությանը՝ Եղոյանը կտրուկ դիրքորոշում է հայտնել. «Մենք գտել ենք այստեղ իդեալական բալանսը։ Եվ այստեղ գալ, փորձել այս նուրբ հավասարման մեջ մի նոր քար ավելացնել, նշանակում է քանդել այս հավասարումը»։ Նրա խոսքով՝ այս նախագիծը երկար ու բարդ բանակցությունների արդյունք է, և դրանում նոր դերակատարի ներգրավումը կարող է խախտել ձեռք բերված փխրուն հավասարակշռությունը։

Քննադատելով այն վերլուծաբաններին, որոնք ԱՄՆ փոխնախագահի պաշտոնը համարում են ձևական, Եղոյանը նշել է. «ԱՄՆ փոխնախագահը շատ գործուն մասնակցություն է ունեցել այս պրոցեսում, նաև Մյունխենից սկսած»։ Նա ընդգծել է, որ ԱՄՆ փոխնախագահի այցը Հայաստան և տարածաշրջան երկարատև ու նուրբ դիվանագիտական աշխատանքի արդյունք է։

Խոսելով Բաքվում պահվող հայ գերիների հարցի մասին՝ նա վստահեցրել է, որ այդ թեման բարձրացվել է Վաշինգտոնում, և ակնկալվում է, որ այն կքննարկվի նաև փոխնախագահի առաջիկա այցի ընթացքում։ «Կարծում եմ, որ արժի այդ մասին խոսակցություն ունենալ», – եզրափակել է Արման Եղոյանը։

Հարցազրույցն ամբողջությամբ՝ տեսանյութում։

Ռոբերտ Անանյան