«Քաղբանտարկյալների և նրանց խախտված իրավունքների մասին» ԱԺ հայտարարության տեքստը չընդունվեց․ ՏԵՍԱՆՅՈՒԹ

Ազգային ժողովի ընդդիմադիր «Հայաստան» խմբակցության հեղինակած «Հայաստանի Հանրապետությունում առկա քաղբանտարկյալների և նրանց խախտված իրավունքների վերականգնման մասին» հայտարարության նախագիծն ԱԺ պետական-իրավական հարցերի մշտական հանձնաժողովում նախորդ տարվա նոյեմբերին քննարկվել էր և լրամշակելու նպատակով հեղինակի առաջարկով նախաձեռնության քվեարկությունը հետաձգվել էր:

Հիմնական զեկուցող Էլինար Վարդանյանը նշել է, որ այդ ընթացքում խորհրդարանական լսումներ են կազմակերպվել, որոնց արդյունքում որոշ լրամշակումներ են կատարվել: Հայտարարության նախագծում անմեղության կանխավարկածի մատնանշման առումով նշվել է, թե ԵԽԽՎ 1900 բանաձևով ինչ չափանիշներ են խախտվել: «Ելնելով վերագրյալով՝ աներկբա արձանագրում ենք, որ ՀՀ բազմաթիվ քաղաքացիներ անմեղության կանխավարկածի բացահայտ ոտնահարման պայմաններում զրկվել են ազատությունից կամ հետապնդվում են ոչ թե հանցանքի, այլ իրենց գաղափարների, իրենց խոսքի և դիրքորոշման համար, որոնց առնչությամբ առկա է խտրական և տարբերակված մոտեցում: Այստեղ անմեղության կանխավարկածին է հղում արվում»,- նշել է Էլինար Վարդանյանն ու հավելել, որ եզրափակիչ մասում նշվում են ՀՀ Ազգային ժողովի կողմից արձանագրվող և փաստվող հանգամանքները: Ըստ պատգամավորի՝ ավելացվել է նաև Մարդու իրավունքների պաշտպանին դիմելու առանձին դրույթ:

«Հայաստանում կան քաղբանտարկյալներ, նրանք համապատասխանում են ԵԽԽՎ 2012 թվականի 1900 բանաձևով նախատեսված չափանիշներին: Սա լուրջ խնդիր է մեր պետության համար»,-ասել է Վարդանյանը:

Քվեարկության արդյունքում հայտարարության լրաշմակված նախագիծն արժանացել է հանձնաժողովի բացասական եզրակացությանը:

Մանրամասները՝ տեսանյութում։