06.07.2026 | 21:50
Ամփոփվել է Երևանի կարճամետրաժ ֆիլմերի 9-րդ միջազգային կինոփառատոնը. հայտնի են մրցանակակիրները
Քննարկում ենք Սոլովյովին Պատվո շքանշանից զրկելու հարցը․ Թագուհի Ղազարյան
Քաղաքականություն
04.02.2026 | 19:10
ԱԺ ՔՊ խմբակցության պատգամավոր Թագուհի Ղազարյանը թիմակիցների հետ քննարկում է Կրեմլի՝ ծայրահեղական հայացքներով հայտնի քարոզիչ Վլադիմիր Սոլովյովից ՀՀ-ի կողմից տրված Պատվո շքանշանը հետ վերցնելու հարցը։
2013 թվականին Սերժ Սարգսյանն էր Սոլովյովին այդ շքանշանը տվել՝ բարձր գնահատելով Հայաստանի և Ռուսաստանի ժողովուրդների միջև բարեկամության զարգացման և ամրապնդման գործում Վլադիմիր Սոլովյովի ներդրած անձնական մեծ ավանդը։
Սոլովյովին շքանշանից զրկելու հարցը սկսեց շրջանառվել այն բանից հետո, երբ նա հայտարարեց, որ, եթե ՌԴ շահերից բխի, նաև պետք է ռազմական օպերացիա ՀՀ-ում իրականացնել։ Այս հայտարարությունից հետո Թագուհի Ղազարյանը Factor TV-ի եթերում էր հայտարարել, որ պետք է քննարկել Սոլովյովին շքանշանից զրկելու հարցը։
Ղազարյանը իր հայտարարությունից շուրջ մեկ ամիս անց Factor TV-ի հարցին ի պատասխան նշել է, որ քննարկումները թիմակիցների հետ շարունակվում են։ Օրենսդի՞ր, թե՞ գործադիր մարմնի հետ է Ղազարյանը թեման քննարկում՝ պատգամավորը հրաժարվեց պատասխանել։
Առայժմ հայտնի չէ, թե իշխանական խմբակցության պատգամավորի նախաձեռնությունն ինչ իրավական հիմքեր ունի։
«Պետական պարգևների և պատվավոր կոչումների մասին» ՀՀ օրենքի համաձայն պետական պարգևներով պարգևատրված կամ պատվավոր կոչումների արժանացած անձինք Հայաստանի Հանրապետության պետական պարգևից կամ պատվավոր կոչումից կարող են զրկվել միայն դատական կարգով:
Նարեկ Կիրակոսյան
