ՌԴ-ն նախատեսում է խստացնել արտերկիր կանխիկ ռուբլու արտահանման կանոնակարգերը

Ռուսաստանից արտերկիր կանխիկ ռուբլու և ոսկու ձուլակտորների արտահանման կանոնները նախատեսվում է խստացնել, հաղորդում է Ինտերֆաքսը՝ վկայակոչելով երկրի նախագահի համապատասխան հրամանագրի նախագիծը, որը դեռևս չի հրապարակվել, գրում է Meduza-ն։

Նշվում է, որ  ֆիզիկական անձինք 2026 թվականի սեպտեմբերի 1-ից կկարողանան ԵՏՄ երկրներ արտահանել 10,000 դոլար կամ ավելիին համարժեք կանխիկ ռուբլի միայն միջազգային օդանավակայանների միջոցով։ Նրանք պետք է տեղեկացնեն միջոցների աղբյուրի և դրանց նպատակային օգտագործման մասին։ Եթե արտահանված ռուբլու հանրագումարը գերազանցում է 100,000 դոլարը, նրանք պետք է ներկայացնեն նաև միջոցների ծագումը հաստատող փաստաթղթեր։

Իրավաբանական անձանց և անհատ ձեռնարկատերերի համար չհայտարարագրված նվազագույն գումար չի լինի. նրանք կկարողանան ցանկացած քանակությամբ կանխիկ ռուբլի արտահանել միայն միջազգային օդանավակայաններով՝ մաքսային մարմիններին տեղեկացնելով։

Բացի այդ, 2026 թվականի սեպտեմբերի 1-ից սկսած՝ Ռուսաստանի Դաշնությունից կներդրվեն 100 գրամից ավելի քաշ ունեցող ոսկու ձուլակտորների արտահանման սահմանափակումներ։ Թույլատրվելու է թանկարժեք մետաղը երկրից դուրս բերել միայն Շերեմետևոյի, Դոմոդեդովոյի, Վնուկովոյի և Կնևիչիի (Վլադիվոստոկ) միջազգային օդանավակայաններով՝ Փորձաքննության պալատի թույլտվությամբ։

Երկու սահմանափակումներն էլ՝ թե՛ ոսկու, թե՛ արժույթի արտահանման հետ կապված, ուղղված են Ռուսաստանի Դաշնությունից կապիտալի արտահոսքի ռիսկի նվազեցմանը, անօրինական գործարար գործունեության ֆինանսավորման կանխարգելմանը և փողերի լվացման դեմ պայքարին։

Գործող կանոնակարգերի համաձայն՝ Ռուսաստանից ցամաքային, օդային կամ ծովային ճանապարհով ռուբլու արտահանման որևէ սահմանափակում չկա: Այնուամենայնիվ, եթե արտահանվում է 10,000 դոլարի կամ ավելիի համարժեք գումար, ապա պետք է հայտարարագրել այն, իսկ 100,000 դոլարի կամ ավելիին համարժեք գումարի դեպքում՝ ներկայացնել գումարի ծագման վերաբերյալ փաստաթղթային ապացույցներ: Կանխիկ արտարժույթի արտահանումը սահմանափակվում է 10,000 դոլարին համարժեք գումարով:

Թարգմանությունը՝ Էմմա Չոբանյանի