03.02.2026 | 22:11
Նիկոլ Փաշինյանը Աբու Դաբի է մեկնել Աննա Հակոբյանի հետ
Երբ խաղաղության համաձայնագիր կնքվի, Ուկրաինայում զորքեր, ինքնաթիռներ և ռազմածովային աջակցություն կհայտնվեն․ ՆԱՏՕ-ի գլխավոր քարտուղար
Քաղաքականություն
03.02.2026 | 19:48
ՆԱՏՕ-ի գլխավոր քարտուղար Մարկ Ռյուտեն հայտարարել է, որ «երկրները, որոնք համաձայն են», իրենց զորքերն Ուկրաինայում կտեղակայեն խաղաղության համաձայնագրի կնքումից անմիջապես հետո։ Նա այս մասին հայտարարել է փետրվարի 3-ին Ուկրաինայի Գերագույն ռադայում ունեցած ելույթում։
«Երբ խաղաղության համաձայնագիր կնքվի, անմիջապես զինված ուժեր, օդում ինքնաթիռներ և ռազմածովային աջակցություն կհայտնվի նրանց կողմից, ովքեր համաձայն են։ ՆԱՏՕ-ի մյուս անդամները կօգնեն այլ ձևերով»,- ասել է Ռյուտեն։
Նա նշել է, որ ռուս-ուկրաինական պատերազմի ավարտի վերաբերյալ համաձայնության հասնելը կպահանջի «դժվար որոշումներ»: Հետևաբար, Ուկրաինան պետք է իմանա, որ խաղաղությունը երկարատև կլինի, և ստորագրված փաստաթղթերը կլինեն արդյունավետ, այլ ոչ թե «ևս մեկ Մինսկ» կամ «երկրորդ Բուդապեշտյան հուշագիր»:
Մարկ Ռյուտեն նշել է, որ Ռուսաստանի կողմից Ուկրաինայի դեմ գիշերային հարձակումը ևս մեկ անգամ հաստատում է, որ Մոսկվան հավատարիմ չէ իրական խաղաղ բանակցություններին։
Իր ելույթում նա հիշատակել է նաև Միացյալ Նահանգների, Ռուսաստանի և Ուկրաինայի մասնակցությամբ ընթացող բանակցային գործընթացը։
«Այստեղ կարևոր առաջընթաց է գրանցվել։ Սակայն Ռուսաստանը շարունակում է հարձակվել՝ ինչպես դա արեց երեկ երեկոյան։ Սա ցույց է տալիս նրանց անվստահությունը խաղաղության նկատմամբ»,- նշել է ՆԱՏՕ-ի գլխավոր քարտուղարը։
Միաժամանակ, ՆԱՏՕ-ի ղեկավարը վստահեցրել է, որ արևմտյան գործընկերները կշարունակեն ճնշում գործադրել Ռուսաստանի վրա և աջակցել Ուկրաինային․ «ՆԱՏՕ-ն տարիներ շարունակ կանգնած է Ուկրաինայի կողքին։ Ձեր անվտանգությունը մեր անվտանգությունն է, ձեր խաղաղությունը մեր խաղաղությունն է։ Այն պետք է լինի արդար և երկարատև»,։
ՆԱՏՕ-ի գլխավոր քարտուղարը Կիև է ժամանել փետրվարի 3-ի առավոտյան և, ըստ երևույթին, հատել է սահմանը, երբ ռուսական հարձակումը դեռ շարունակվում էր։
Թարգմանությունը՝ Էմմա Չոբանյանի
