ԵՊՀ-ում կուլիսային քննարկումներ չեն լինելու, ինչպես ՈՒԽ-ն արել է տարիներ շարունակ. Արայիկ Հարությունյան. ՏԵՍԱՆՅՈՒԹ

Երևանի պետհամալսարանի ուսանողական խորհրդի և «Ռեստարտ» նախաձեռնության միջև կոնֆլիկտը նոր զարգացումներ է ստանում: «Ռեստարտ»-ում պնդում են, որ ուսխորհուրդն ապօրինի է գործում. չեն գումարվում կանոնադրությամբ սահմանված համագումարները, չի հաստատվում ֆինանսական հաշվետվությունը, չնայած ուսխորհուրդը համալսարանի բյուջեից է օգտվում։ Մյուս կողմում հակառակն են պնդում:

ԵՊՀ-ում նոյեմբերի 8-ին ուսանողական երկու խմբերի հանդիպումը վիճաբանության է վերածվել։ «Ռեստարտ» նախաձեռնության անդամ Դավիթ Պետրոսյանը դեռ սեպտեմբերի 20-ին նամակ էր ուղարկել ԿԳ նախարարին՝ ուսանողական խորհրդի կանոնադրությանն առնչվող մի քանի խնդիր մատնանշելով: Փոխնախարար Հովհաննես Հովհաննիսյանը, նամակը հիմք ընդունելով, առաջարկել էր ընդհանուր ուսանողական ժողով հրավիրել, ընդունել նոր կանոնադրություն և ներկայացնել նախարարության՝ հաստատման: Փոխնախարարը նաև խորհուրդ էր տվել պղտոր ջրում ձուկ չորսալ և հակասություններ չփնտրել այնտեղ, որտեղ դրանք չկան: Ի պատասխան՝ ԵՊՀ ՈՒԽ նախագահ Դավիթ Ափոյանը հայտարարել էր, որ սա երկակի խաղ է ընկալվում։

Արայիկ Հարությունյանն այսօր ԵՊՀ-ում էր, ո՛չ այս թեմայով: Սակայն կողմերին աջակցող ուսանողները պաստառներով հավաքվել էին միջանցքում՝ լսելու նախարարի պաշտոնակատարի հայտարարությունը։

Արայիկ Հարությունյանն առաջարկեց փոքր կազմով փոխնախարարի հետ քննարկում անցկացնել: Ասաց՝ կուլիսային քննարկումների ժամանակը վաղուց արդեն անցել է: Ուսխորհրդի փոխնախագահ Դավիթ Մաթևոսյանն ասում է՝ Արայիկ Հարությունյանն ակնհայտորեն ընդունեց փոխնախարարի հայտարարությունը, սակայն, նրա խոսքով, ԿԳՆ-ն իրավունք չունի լուծարել ուսանողական խորհուրդը, քանի որ այն ինքնակառավարվող կառույց է: Ուսանողների հետ հանդիպումը հստակ արդյունք չտվեց: Ամեն դեպքում, Արայիկ Հարությունյանը վստահեցրեց, որ քաղաքական ոչ մի ենթատեքստ չկա, ամեն ինչ արվելու է օրենքի սահմաններում:

Մանրամասները՝ տեսանյութում;