Շիրակի մարզպետարանից հայտնում են, որ հայրենիքի պաշտպանության համար զոհվածների հիշատակի օրվա կապակցությամբ Շիրակի մարզպետ Դավիթ Առուշանյանի գլխավորությամբ մարզպետի աշխատակազմը, համայնքների, ուժային կառույցների, կրթական, առողջապահական հաստատությունների ղեկավարները, զինվորականներն ու ազատամարտիկները այցելել են Շիրակ գերեզմանատան «Ազատամարտիկների պանթեոն», ծաղկեպսակ ու ծաղիկներ դրել հայրենիքի համար կյանքը զոհաբերած հերոսների հուշակոթողներին ու շիրիմներին, հարգանքի և խոնարհումի տուրք մատուցել նրանց հիշատակին։
«Այսօր շատ խոսելու կարիք չկա, այլ լուռ խորհելու առիթ ունենք, մտածելու անելիքերի մասին։ Պետք է հասկանանք, որ մեր հերոս տղաները ամենաթանկը՝ կյանքը, տվեցին Հայաստանի Հանրապետության անկախության ու ինքնիշխանության համար, Հայաստանի Հանրապետության հարատևության համար և մենք բոլորս պարտավոր ենք քաջորդիների կյանքի գնով պահած հողն ու երկիրը շենացնել, զարգացնել ու խաղաղություն բերել։ Իրականաում բոլոր պատերազմների ելքն ու իմաստը խաղաղությունն է, մեր տղաները ամենաթանկ զոհողության գնով խաղաղություն են բերել Հայաստանին և թող հարատև լինի այնքան թանկ գնով ձեռքբերած խաղաղությունը»,- լրագրողների հետ զրույցում նշել է Դավիթ Առուշանյանը։
