16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Կատարի դեսպանն իր հավատարմագրերն է հանձնել ՀՀ նախագահին
Քաղաքականություն
16.01.2026 | 21:28
Հայաստանի Հանրապետության նախագահ Վահագն Խաչատուրյանը ընդունել է Հայաստանում Կատարի Պետության արտակարգ և լիազոր դեսպան Մանսուր Աբդալլահ Ալ-Սուլայթինի հավատարմագրերը։
Նախագահի աշխատակազմի փոխանցմամբ՝ շնորհավորելով դեսպանին նշանակման կապակցությամբ՝ նախագահ Խաչատուրյանը կարևորել է այն փաստը, որ նա Կատարի առաջին ռեզիդենտ դեսպանն է Հայաստանում՝ ընդգծելով, որ այդ քայլը նոր հնարավորություններ է ստեղծում երկկողմ հարաբերությունների զարգացման համար։
«Վստահ եմ, որ Ձեր գործունեությունը կնպաստի Հայաստանի և Կատարի միջև հարաբերությունների հետագա մերձեցմանն ու զարգացմանը»,– նշել է նախագահը՝ հավելելով, որ Կատարը Հայաստանի համար բարեկամ պետություն է և կարևոր գործընկեր Ծոցի տարածաշրջանում։ Նա նաև արձանագրել է վերջին տարիներին հայ-կատարական հարաբերությունների առավել ակտիվ զարգացման միտումը։
Դեսպան Մանսուր Աբդալլահ Ալ-Սուլայթինը շնորհակալություն է հայտնել ընդունելության համար և փոխանցել Կատարի Պետության էմիր Շեյխ Թամիմ Բին Համադ Ալ Թանիի ջերմ ողջույնները։ «Հայաստանի Հանրապետությանը և Կատարի Պետությանը կապում են բազմաբնույթ և ամուր կապեր, որոնց հիման վրա կարող ենք շարունակաբար զարգացնել և ընդլայնել մեր համագործակցությունը»,– նշել է դեսպանը։
Հանդիպման ընթացքում քննարկվել են Հայաստանի և Կատարի միջև քաղաքական, տնտեսական, զբոսաշրջային և այլ ոլորտներում համագործակցության զարգացման ընթացքն ու հեռանկարները։ Կողմերը կարևորել են երկկողմ փոխգործակցության շարունակական խորացումը՝ փոխադարձ հետաքրքրություն ներկայացնող ուղղություններով։
Անդրադարձ է կատարվել նաև բարձր տեխնոլոգիաների, ենթակառուցվածքների, զբոսաշրջության և այլ ոլորտներում ներդրումային ծրագրերի իրականացման և ներդրումների ընդլայնման հնարավորություններին։
Երկուստեք բարձր են գնահատվել երկու երկրների միջև իրականացված բարձրաստիճան փոխայցելությունները՝ որպես երկկողմ հարաբերությունների զարգացմանն ու գործընկերության ամրապնդմանը նպաստող կարևոր գործոն։
